اَیویں کُنڈے پیا کھڑکاونائیں

''اَیویں کُنڈے پیا کھڑکاونائیں

ہووے اندر کوئی آوے''

''کِتھے نیں؟''

''تیرے ہار ای سارے

نِکل بُوہے کھڑکاون گئے نیں

'کُجھ دیو سائیں سِیساں لؤ

بال دوئے میرے ہسپتال نیں'

'خبردار بئی جاگدے رہنا'

'نِکل اوئے تیری سِری ماوُ دی

نس کرخانیوں آ وڑیائیں ہڑتالی سالی دیا'

'ویچو بھاویں کرائے تے دے دیو

حصہ پا لؤ اسیں پلازا پائیے ایتھے'

'بھن دیو بُوہا جے نہیں کھولدا

پتہ نہیں نا ایہنوں پُلس دا'

'گھر مسجد لئی دے دیو

اگے دُکاناں پَیسن

حصہ تہاڈا وی وِچ ہوسی'

''نِکل تے آیائے''

''کون''

''تُوں''

''کِتھے گیائے اوہ جیہنوں کڈھ کھلہاریو ای''