جِنا میلن دا آہر کرو
گھڑیاں تے اگڑ پِچھڑ ہوون دی دھاری اے،
ترے منٹ کوئی اِک اگیرے
پنج ست کوئی دُوئی پچھیرے
کہے تریجی بس نی میری واری اے،
گھڑیاں حرم ہویاں شاہ ویلے دا
چلدیاں ہوون کہ کھڑیاں،
شاہ ویلا ہے سایہ خُدایا
تخت منال1 دھرائے اُتے 'خود آیا' ہو بہندا اے
پچُھ نروار؟
نہ اوہ وِچ اِین آئین نہیں،
وار کاراں دِیاں آ لڑ لڑیاں
بنھ صفاں دربارے لِکھ لِکھ پوتھے نذر کریندیاں نیں،
ورھا جاں نواں چڑھے
دس وِیہہ ورھے پِچھانہہ کر تخت وچھاون حُکم ہے،
شاہ ویلے دے ہور بھرا وی نیں
اِک کویلا اِک سویلا
کئیں سیانیاں لِکھیائے، نہیں
اوہ چاچے تائے نیں،
پھُپھڑ ماسڑ کئیاں ثبوت کرائے نیں،
کھوجیائے کئیاں اِک بھرا طبیلہ وی اے
1- منال= جگہ جِتھوں منافع ہتھ آوے، دُکان، زمین جیویں (جائیداد، پروپرٹی)-
گھوڑے چابک سواراں ہیٹھاں
ایہہ نہیں ویہلا
چڑھیا ہر ماہ آپ کرائے رہندا اے
مِیر کویلا کدے امیر کدے فقیر
سنت مہنت قلندر پِیر،
مِیر سویلا دفتر قلعے کچہری بھوندا
'بَس میں آیا کہ آیا سمجھو’ کہندا اے،
گھڑیال وی اگے ہوندے آہے خواجہ سرا
شاہ ویلے نوں حرم سرا دی لوڑ ای نہیں