سویرے ویگن وِچ
بالاں لئی
کوئی بہن دی تھاں نہیں ہوندی
اسیں دفتراں ہیٹاں والے
ضروری کماں کاراں والے ای پُورے بہہ نہیں سکدے
جے کوئی بال قضائیں
نونہہ سیٹ تے اڑیا لبھے
اسیں باہروں وڈیرا وڑدا ویکھ کے جھب اوہنوں ہُجھنے آں:
''اُٹھ بَلیا تھاں دے''
اوہ شکلوں ساڈی رُوٹ سواری نہیں
کالا گھون سِرا کھڑکنّا
گھر دا دھوتا وٹو وٹ کُڑتا
گھر دے دھوتے وٹو وٹ کچھے کولوں چوکھا اُچا
ہُجکا گیند ہار اوہنوں اگوں پِچھے ریڑھدائے
باہروں وڑدیاں بوٹاں ہیٹھوں
پیر چھکیندیاں
نالے اکھاں بھینگیاں کردائے
نالے ننگیں بُٹیں مُسکدائے
(میں اِکواریں آپنے یار وڑیچ دے پِنڈ ساں
میرے یار وڑیچ کُجھ ویہل اکیواں بھنن لئی
کُجھ میری خاطر کرن لئی
اِک چُوڑھے بال دی دھوتی لاہ کے اوہدے سِر تے ول دتی
اوہدیاں اکھیاں بھینگیاں ہو گئیاں
تے اوہ ننگیں بُٹیں مُسکیا)
ایہہ اصلوں ساڈے رُوٹ دا بال نہیں
جے ہوندا
کِتے وِرل تاڑ کے اڑن دی کردا
پولے گیند وانگ پیا اگوں پِچھے پِچھوں اگے رِڑھی نہ آوندا
علوی چڑھدے نوں میں سیان لیائے
ویہہ ورھے پہلوں
ایہنوں میں اینویں اِکدو واریں مِلیاں
میں نہیں چاہوندا علوی مینوں پچھانے
ویہہ ورھے پہلوں اِکدو واریں ایہنوں مِل کے
مُڑ کے مِلن نوں جی نہیں کیتا
مینوں پکا یاد اے
نالدیاں نوں تھلے لا کے
آپنے نمبر ٹنگن دی ایہنوں ڈاڈھی جاچ سی
میں نہیں چاہوندا
علوی مینوں پچھانے
میں اکھاں تاکیوں باہر وگا چھڈیاں نیں
علوی وڑدیاں وِرل تاڑ کے میرے کول ای دھس کے اڑ گیائے
چلو شُکرے
مینوں ناہس پچھاتا
میں اکھاں اندر کر لئیاں نیں
بہندیاں سار ای علوی رِڑھدے گیند نوں آسرا دیندائے
پھیر سہج سبھا اوہنوں گوڈیاں اُتے ٹِکن دی تھاں کر دیندائے
مینوں اِکدِل آہندائے:
نمبر ٹنگ گیائے دلّا
پر اِکدِل آہندائے
میں چاہوناں علوی مینوں پچھانے
میں چور اکھیں ویہناں
اوہ پھسیا اڑیا پیا ہنگلاوندائے
اوہدیاں مُچھاں چِٹیاں نیں اکھاں دوالے ماس وی کُجھ کُجھ ڈھلکیا ہویائے
ایہہ بندہ علوی ہے کہ نہیں؟ مینوں اِکدِل آہندائے
اوہدے گوڈے اٹکے
گھون سِرے کھڑکنّے ول میں اینویں ویکھناں
بُٹ تے ایسلے کجے ہوئے سُو
پر اکھاں اصلوں ای بھینگیاں ہوئیاں پئیاں نیں