قُطب کاکی دے در تے پیو بیٹھا
دادا چوکھٹ اجمیر،
کم ملتان اے
راہ وچ آوندے نیں
لڑ پھڑئیے نہ حضرت فرید دا ہُن
روح راضی ہووے نالے وڈیاں دا
کاروبار وچ برکتاں ہور ہوون
“ونی سوہنیئے
بنھ سامان دیویں”
آئی نھا اوہ کپڑے نویں پائی
“ڈولی چڑھن آئی ایں” ہس آکھناں میں
ونی گنڈھ کھولی
وچ رومال کڈھیا
“ایہہ کیہ”
“کَت کڈھیا چِراں دا ایتنا ای اے”
میں حیران
“ایہہ اُپر کیہ”
“دوہڑا اوہدا”
“فارسی وچ کلام ہے حضرت دا کُجھ
دوہڑا ایہہ کِتھوں”
“پڑھو”
“کیہڑی بولی اے خبرے سُنا تُوہیں”
ونی گاون لگی
“جِت دیہاڑے دھن وری
ساہے لئے لکھائِ
مَلک جو کَنّیں سُنیندا
مُونہہ وکھالے آئِ”
واج ہور جیہا
لگے کندھاں میری حویلی دیاں کنبدیاں نیں
ونی ہور دی ہور ای ہوئی جاپے
ڈر جیہا آون لگا،
کم ملتان نبیڑ اجودھن آیاں
چھپر ہیٹھ باوا بوہکر پھیردا اے
میں دسیا آپنا، وڈیاں دا،
کوتر سو میں اشرفی نذر دھری
سینتر اِک درویش نوں کیتیوسو
“جاؤ دیو کمائی ہے جیہناں دی ایہہ”
پوٹلی چا اوہ نِکل گیائے
ڈَور بھور میں کُجھ نموجھان وی ہاں
“میری لونڈی اے ونی
ایہہ رومال سرکار اوس گھلیا اے”
باوے کھول ڈِٹھائے
“جگ ویچ ہُٹیا دَھن ہوئِیوں نہ تُوں”
اکھیں رُنیاں چُم رومال لایائے،
سارا دینہہ دلیلاں چ کٹیا میں
مہنگی گِھدی چوکھی
مرضی باوے دی ہے میں آزاد کراں
ویچ دینے آں چلو
جیہڑا لئے اوہ خبرے آزاد کرے
پر پھیر ثواب تے لے گیا اوہ
اوڑک شامیں میں حاضری مُڑ دِتی
“حُکم سرکار دا سِر مَتھے
میں آزاد کیتی”
“آپ آزاد ہوئیائیں؟”
اکھاں میریاں وچ باوے ہس جھاتا
دِلّی پرتیاں میں اگے ونی کوئی نہ
سال ہویائے
میں روز پُچھ بھال کرناں
کوئی سُوہ نہیں کِسے
جنی کھنی نوں تک کُوکاں “ونی، ونی”
گلاں کردا اے لوک سِر پِھر گیا اے
گھر وران اے
اُجڑ کاروبار گیائے