فرید بھنڈار

1

شہراں وچوں شہر سُنیندا پنج جیہدے دروازے

چار تاں اکھیں لَبھن وَگدے پنجواں بند سُنیندا

چونہہ دے چار بزار دِسیندے

جیہڑے بزاریں اندر لنگھو دُھر وچکار شہر دے لشکن

بُرج منارے راج قلعے دے

دوہرے برج تے دوہر جھرو کے دوہر فصیل دوالے

راج قلعے وچ راج محل تے چھاؤنی تے دربار کچہری

میر وزیراں- سردیواناں دیاں حویلیاں

توشے خانے مال طبیلے بندی خانے

راج قلعے تے رب دا سایہ

ملتان شہر وچ ڈِھڈاں اندر گَنڈھ جو کُھوں دی

کیہ بنسی جے ایڈے پندھ کریندے وی نہ پجے کدائیں

کیہ بنسی جے بُھل بُھلیکھے اندر ہتھ مریندیاں

لدھا پنجرہ ہک ڈینہہ سَکھنا

گنڈھ جوکھوں دی نپن کان اساں ہٹیاں کوٹھے پائے

یاریاں ساکا چاریاں لائیاں- وَیر سہیڑے

گنڈھ جوکھوں دی ڈِھڈاں اندر رَڑکن رَڑکن رہی

ڈِھڈدی رَڑکن بھل جاؤ ویکھو ڈور حکم دی ناڑوُ

راچ قلعے تے رب دا سایہ

شہر تے ٹھنڈی چھاں قلعے دی

ماں دی رعب تسلا

نہ کائی ہتھیں کتے نہ کائی تیل دیویاں پاوے

سُتیاں پئیاں کائی جُھٹ زناہی

شرماں اساڈیاں لاہوے

راج قلعے تے رب دا سایہ

باہر فصیلوں پیر نہ پاون میر وزیر سیانے

پانی اندر ٹور ترکھی پِینگھ دے رنگ عجائب

باہرپانیوں پولا پنڈا جاں چانے جاں آنے

قلعیوں باہر فصیل دے ہیٹھاں

درس مدرس پنڈت مفتی شاعر گایک مُجرے تاشے لونڈی باشے

ڈھول ڈھنڈورے نقل مخولی ورتاں تے ججمانیاں پالن والے لاگی

کمی سیپی عملے فیلے شہروں آونے روز سویلے

 توہے توہے ہَلیا بَلیا دینہہ لنگھ ونجنا خیریں سَلّا

شام پئی سٹ گڈیا پٹیا ٹُر جانا نیویں پا کے

قلعیوں باہر بزاراں اندر کھوجے کھتری لکھاں کار بپاراں والے

رنگو رنگ حویلڑیاں

آل دوال فصیلڑیاں

وکھرے عملے کمی سیپی وکھرے راگی لاگی

میر وزیر دیوان قلعے دے کھوجیاں کھتریاں دے قرضائی

پر کھوجے کھتری لوک ویہاری

کدے گل نہیں سرکرواوندے

سگوں کار بپار ودھاون لئی نت قلعیوں حکم منگاوندے

آپنی کھٹی وچوں اندر بھاجی روز پچاوندے

گھر گھر جھاتی بُرجاں اُتوں

ہر گھر اندر دوہرے جوڑے دوہرے بھانڈے

ہِک اندر خانے ورتن لئی ہک کوٹھے سکنے پاون لئی

کمی لوکاں کچھیں رکھنے دوہرے جوڑے

ہِک قلعے دے اندر جاون لئی ہک گھر وچ بہہ پچھتاون لئی

کھوجے کھتری لوک ویہاری ہکو جوڑا پاوندے

قلعیوں اندر گھریں بزاریں

اوہا جوڑا ڈب کھڑبّا ساری عمر ہنڈھاوندے

ملتان شہر وچ دوہرے دوہرے جوڑے پاوندیاں

پاپا ویہندیاں لاہ لاہ ویہندیاں

سر توں لنگھنے سورج تارے بدل پالے

کالے دھولے تھی ونجنے

جوڑے جوڑے رہ جانے نہ رہنے ویکھن والے

شہروں باہر زمین سبھ رب دی

قلعیوں مال مسدی منشی فصلو فصلی آونے

کنک کماد تے نَرمے مُنجیاں اوہناں ڈھو ڈھو شہر پچاونے

گڈن گوڈن والی کمی- گنڈھ ترپ جٹاتر پٹکے

مُچھیں دھوڑ نموشی متھے

ہاڑی ساونی کَوڈی بھورے

کوڈیاں جوڑ جوڑ کے شہریں جاونا تے وت نہ آونا

کھوہاں اندر اُلی جمنی داند نکھسمے بَھوندے جُھرنے

شہریں آن کے ہِکناں جٹاں کھوجیاں کھتریاں نال بھیالی پاونی

ہکناں قلعے فصیلوں ہیٹھاں

کائی قاضی مفتی شاعر گایک بھنڈ مخولی بھال شگردی پھڑنی

پر بوہتیاں پنجویں بوہے، ہیٹھاں جابد رو اُتے ڈیرے لاونے

ایہہ بدرو ملتان شہر دی رِیت پرانی

ویہنی ویہنی موری موری راج قلعے دے ہیٹھوں ٹُرنی

سنگھنی سانجھ ان جانی

راج قلعے دے لوک سیانے

آپنا باہر سجاون لئی نت اندر کھورن جیہڑا

اوہ وگ بد روئیں جاوے

ہِکو رنگ دی گار سلیٹی

ہولی ہولی ہیٹھ زمین دے لکھاں رنگ سمیٹی آوے

قلعیوں ٹُر بد رو وَت آونی ہیٹھ بزاراں

کھوجے کھتری لوک ویہاری

سبھ بد رو نوں ہیٹھو ہیٹھ لنگھاوندے

راج قلعے دی گاردے اندر آپنی گار رلاوندے

پنجویں بوہے ہیٹھاں بدرو آونی باہر زمینوں

آوندی دے ایہدے دوویں کنڈھے کمیاں مَلنے

جُھگی جوگی بئی شہر وِچ کائی جاء نہ ہئی

جِتھاں کمی چاہڑن جُھگا اوہ کھوجیاں کھتریاں لئی

کمی سیپی لوک بے سُرتے

مَل زمین بگانی مہنگی اُتے ولدے کندھیں کچیاں

کمی سیپی لوک بے سُرتے

اندر کُھردے جاندے نوں نپ ہیٹھو ہیٹھ وگاون دا ول دسے ایہناں نوں کیہڑا

ساون جھڑیاں اُچھل بد رو کنڈھے چَھڈ چَھڈ جانی

وچ کمی چھوہراں مُردے تاریاں ترنیاں

مُردے تاری تَردے تَردے

اکھ اُگھڑے قلعے وچ ہوئیے

پنجویں بوہے ہیٹھ وسیندیاں پنجواں بوہا کسے نہ ڈٹھا

اَت زنگالیا کُھریا بُھریا کندھ دے نال ای رَلیا

پنجویں بوہے اُتے لوکاں گوہے پَتھ پَتھ لاونے

جد بد روئیں ٹھیکیدار اُگراہیاں کرن سپاہیاں دے سنگ آونا

جھٹ پٹ لوکاں پاتھیاں لاہ لوہ ایدھر اودھر کرنیاں

سرکاری کندھ تے پاتھیاں لاونا جرم جو ہویا