اسیں اِکو اندرے رہنے آں پر مِلدے نہیں
میں تے چوہا میرا بیلی
کدیں کدیں ایہدا سر دِس پیندائے
کدیں کدیں ایہدی پُوچھل
پل دا پل ایہنوں ویہل مِلے
تے میں کول بلاواں نال بٹھاواں
اَینویں گل وِچ باہواں پا پا گلّاں کراں وللّیاں
آ اوئے دلّیا پُھمنا میریا
آمِل کیچ شہر دا والی
کِیہ کردیاں عمرا گالی
لمّی رات دلیلاں کر کر کٹدائے وِچ الماری دے
دِنیں کتاباں اوہلے لُکیا نِکی نِکی کوئی پھولا پھالی کردائے
جے مینوں لگ جائے سُوہ پئی لبھدا کِیہ اے
ایہدی ساری انوکھی وست گواچی
میں اِک تھاں لواں لُکا
ایہنوں دیاں جَھکا جَھکا
تے مگروں دوویں ہسدے ہسدے
دوہرے چوہرے ہو ہو جائیے