گل توڑے پُرانی اے نوِیں کرئیے
وٹدے نِت نویکلے رُوح پِچھے
جھٹ بُت پُرانا نہ اج دھرئیے؟
کون اساں تُساں اج ہور ہوئے
اساں واہن واہے اساں گاہن گاہے
گڈ ہاڑیاں کیتیاں ساونیاں نیں
مَیرا ریتڑاں نوں ساڈی سار کیتا
ونڈ تن بھوئیں مَرل مُربیاں تے
تُساں دھن اُتاریاں چھاونیاں نیں
کون سادھ سدیویں نیں مسنداں تے
کون نِت تدوکنے چور ہوئے
وِچ باہرلے کرن وپار آ گئے ساہ ساہ وِچ کمپنی باغ لگے
لاٹ گھر سِر تے
پیریں لاٹ دفتر
وِچھیاں وِچ وچالڑے مال روڈاں،
چِت چیتڑے لاٹری کھول دِتی
کوٹھے کوٹھیاں ہوئے
اُچ کوٹ قلعے اردل وردیاں پہن کھلوتڑے نیں
پِنڈ رہے چِڑیاں
شہر تھئے اِلّاں
جنگاں لائیاں بھرتیاں کھولیاں نیں
سَت ستیا دی بولی بول دِتی کرنی ہتھاں دی بنھ مُردار کر گئے
زمیندار کِتے شاہوکار کِتے
پال جُوٹھ تے تہانوں سرکار کر گئے
ہاڑی ساونی نین پران والی تُساں ہو جہاز لدا ٹوری
اوتھے جُٹ پئیاں کُوڑ گھڑت مِلّاں
سودا لُٹ دا تُسیں دلال ہوئے
آپ باہر تھی اوہ اندر آن بیٹھے
ٹھوک اندراں وِچ تہانوں باہر کر گئے
چونکو چونک ہے دیگ ولیمیاں دی وِچ پئے جو سوئی حلال ہوئے
کیہی لوڑ تہانوں سَنت ویس والی
شیشے اپنے اگے کھلوونا ہے
ٹھگی دُھروں پشاک ہے سُلیمانی
ظاہر رہ تُسیں غائب ہوونا ہے
نویں ٹوئے کڈھو
اُتے پُل اَڈّو
گھوڑی نِت چڑھے اوہا راج کُبّا
جیہڑی ڈھال ساڈی اوہ سمھال تہاڈی
روز چاڑھدے او اوہا دینہہ ڈُبا
ویکھو رات وکھیندی اے کیہے سُپنے
جیہڑی گھال ساڈی اوہا چال تہاڈی
لائے ڈھیر جو اوہا ای ڈھیریاں نیں
کاڑھ خون صبُون پئے نِت ویچو
ہتھ لِبڑے جُگاں دے نہیں دُھپنے
گھڑ گز گواچیا تت میچو
ناویں خوش خطی ٹُھکے سنگ مَرمَر ایہا ازلاں توں تیریاں میریاں نیں
کِکر نِم کرِیر
اساں کِھیر رِدّھی
کر چھج سرِیر اساں مُونجھ چَھٹّی
تکلے تان نینیں رُوح کَتیا اے
ریتی ویلنے سنّھی کہاڑ بیلی
اساں ہڈ جوڑے
سِیر اَکّ سہیڑ نبیڑ پھوڑے
اساں چُم رسّے
سانجھ صدق دے
آس مواس وسّے
اساں رُکھ جھالاں
تن چَھل پروار پُھہار چَھٹّے
کدیں پَھل پُھلوں کدیں پُھل پَھلوں
آپے واء اسیں آپے بھاء اسیں
تت ککھ سانوں ست سک سانوں
جیویں سہج سرے تیویں سار ماہی
آہی وِچ ناہی ناہی وِچ آہی
شک پَک سانوں پَک شک سانوں
جگ جُون اُتھلنی کار ماہی