کیرا
رُکھ دے ہیٹھاں کچے چاول کیر گیائے اج کوئی
سُکھیا ہو سی-
اِک گالھڑ اِک کاں نیں آہمو ساہمنے
ڈر ڈر چُگدے اِکدوجے کولوں
گالھڑ آپنا ڈر ظاہر نہیں کردا
تاڑی کاں ول لائی ہوئی سو پُوچھ بھوائی آوندائے
کاں آپنا ڈر موہرے دھردائے
جیویں ایہہ رَچھ اے اوہدا، اِک پیر کنیا کے اگے اِک بُھڑک کے پِچھے
گالھڑ نوں چوپیرا خبرے سمجھدا ہوسی
پکھی چوپیریاں نال حساب دا مِلدے نیں
کاں اُنج وی سیانے لوک ہوئے
بِلیاں کُتیاں نال تے اُٹھن بہن روز دا ہویا
ہاتھی شیر دی کنڈ تے وی بہہ آوندے نیں جے موقع بن جائے
گالھڑ اگلیاں پیراں نوں جد ہتھ بنیندائے
تدوں ایہہ خبرے اوہنوں بندہ سمجھ ڈر جاندے نیں
لئو گالھڑ اِک توں چار ہوئے جے
کیرا چوکھا اے
وت وی اِکدوجے نوں گُھوردے ہُجھدے نیں
اِک وچوں خبرے پُلس افسر اے
ترونہہ نوں پرے پرے پیا کر کے مُچھیں چاول اَڑُنبی آوندائے
کاں نے موقع جاچ کے بول بُلارا کیتائے
ڈاراں لہہ پئیاں نیں
گالھڑ سَرک گئے نیں
دُور کَھلے ہُن ویہندے نیں پئے
کاں گھتیرا بنھ کے کھلوتے چُنج چُنج پئے سہج بھنڈارا چَھکدے نیں
کوئی کنیاون کوئی بُھڑکن نہیں
ڈر پستولاں سبھ نے کیساں وچ کر لئیاں جاپدِیاں نیں