"ٹائی سُوٹ ایہہ کون بُوہے تے آیا اے"
"یار ہوندا ہا کسے ویلے
ہُن باہر ای ہوندائے
سینہ تھاپڑ ایہنے آکھنا اَسیں جُلاہ ہاں ازلی ابدی
مادھو لال حسین دے منن والے آں‘
گھر وچ کَھڈّی چلدی آہی پڑدادے ویلے
جدوں مشیناں آئیاں کھلو گئی
مِل وچ بھرتی ہو پڑدادا لاؤن مروڑی لگّا
نالے دادا
بنیا پاکستان تے مِل وی مسلمان ہوئی
رَلیا پیو وی
پھیر ایہہ اگوں پُتر َرلیا
مالک اک دِن گھر ایہدے آیائے
’کَھڈّی تیری نوِیں مِل دے گیٹ تے رکھی جانی اے‘
’میاں جی نوکر میں آں ایہہ نہیں
پڑدادا میرا سمجھو وچے ای بیٹھا جے‘
’اسیں مِل دے گیٹ تے اوہنوں یار بہاونا اے
کل مُلکھ تے اوہدا ناں دُھماونا اے‘
’نہیں میاں جی میں پڑدادا نوکر پرت کراونا نہیں‘
اسیں یونیئن وچ ایہنوں کیتا اگے
پارٹی وچ ایہہ آپ اگیرے ہویا
پھیر کوئی گورے آئے کھڈّی کھول امریکہ لے گئے
یونیورسٹی وچ کسے اوہناں لائی جا
ایہہ وچ بیٹھ چلاوندا ڈالر پاؤندا اے
خط مینوں لکھیوس انقلاب میں ایتھوں اوتھے کھڑنا ای
چھڈ مزدور سیاست آجا'
میں جواب نہیں دِتا
ناں پڑدادے دا ہُن ناں نال لایا اے
ایتھے انٹرویو لئی چینل کسے بُلایا اے
"سدنائے اندر؟"
"تُوں دس"
"باہر کھلوتا ای چنگائے"،
"آہو، ٹُر گیا اے
"چھڈ گیا اے پِچھے دُھواں گڈّی دا"