''میں ہوواں تُوں ہوویں''
''اوہ تے ہاں ای''
''ہو جائیے جے سپچُو تاں ہور کیہ چاہیدائے
پر گل میں ہور پئی کردی ساں''
''کرو نا سرگھی جی''
''میں ہوواں توں ہوویں میاں گنڈویا ہووے
اگے دا کیہ کرنائے جِس دم سوچنے آں
پِچھا اساڈا جو وی اے اوہنے ہتھ اپنا وِچ دھرن دا آہر تاں کرنا ای کرنائے
ویکھیں نا تصویراں باتشاہاں دِیاں
جیہناں واہیاں کلاکار تاں آہے اوہ
کلا وِچ پر اوہناں دی
تخت دے ہِت دا رلا ہے کتناکُ
تے اپنے پِچھے دا کِتنا
کون ایہہ جاچ کرے''
''اگے مُنشی مُسدّی آہے ایسے کم لئی
پھیر جوائنٹ سیکرٹری سیکرٹری
پھیر مشیناں آ گئیاں،
ہُن فوناں ای مُنش مُسَد نیں
فوناں ای سیکریٹیرئیٹ''
''جاچک1 بھاویں فون مشین ای ہووے شپنا
جِس بنائی جِس کار لئی
اوہدا بھیت پرچھاواں وی وِچ ہے کہ کوئی نہ،
1- جاچک= جاچن ہار-
باتشاہی دے ڈھائے چڑھ گئے حضرت میاں مصور
یا اوہ ایہناں دے چڑھ گئی
ہو تصویر تاریخ بنن لئی''
''دو گھڑیاں جے نال سوالیا باتشاہی نے کِسے نوں اپنا کم کڈھاون لئی
تاں اوہدا کیہ جانا ہا
ایویں تے چلدی آئی اے ہُن وی چلدی اے پئی''
ہائے، تہاڈی باتشاہی وی شپا سلامت
ایویں چل پئے دو گھڑیاں تے کیہ اے،
نہیں پر
اوہنے آپ تے چلنا ای نہ ہویا
سانوں چلائی جانا ہویا عُمراں پیدل،
پر باتشاہی جیہدی گل اساں پئے کردے ساں
کلاکار اوہدے پیدل ہوون بھاویں ہست اَسوار
بُہتے کپڑے جُتیاں ای سُنگھ سُنگھ اوہدے
لہہ لورے عمراں کٹدے نیں پئے
کُجھ پنج ست پل اوہدے پلنگ کِسے تے پے کے،
پلنگ وی ہوئے ہزاراں اوہدے تھاؤں تھائیں
اوہ وی نیں وِچ وِچ پُتر جیہناں نوں دے ٹوردی اے
یاں دِھی پُتراں جیہی،
اوہ گھراں وِچ گدیاں ڈاہ کے
لوک نوں لنگر شاہی پئے ورتاندے نیں
پر گل تے ہور میں کردی ساں پئی''
''کرو کرو نا سرگھی جی''
''کیہ کراں،
تُوں سُن شپنُو ہور دی ہور کر دینی ہوئی
جیویں اج کیتی آ
ایہو تے باتشاہی اے تیری''