ستاں ورھیاں دا ہوساں
وڈے خاں دے باگ دی راکھی لگاں پیو نال اپنے
چڑھ لاہن وی کار اساڈی ہوئی
ہِک کِھیر امباں چوں کِردائے
جتھاں لگ ونجے پھوڑا اُگ پوندائے
مَل سرہوں سریر اساں
پال اپنی کُوں پَیل کرینے آں مالک دی
تُل آڑھت کنڈے لاہی اساڈی لہہ وڑدی اے منڈی
راکھی ساکھی چڑھ ویندی اے ساڈی بنک دے کھاتے،
مِن گِن گھاٹے وادھے
جُھردے پُھلدے نیں خان خنُودے،
اساں دھو سرہوں سریروں
بہنے آں رُکھی مِسّی،
پُتر خان دے میڈے ہانی باہروں پڑھ آئے
وڈے فارم بنائے
ہُن پُتر اوہناں دے اگوں
ادھ ہاڑ جاں تھیندائے میکوں آہدے نیں
تایا تُوں نہ جد تائیں لاہیں اساں لہانے کوئی ناہوں
مَل مَل سرہوں چُماسا ہڈاں توں لاہنا پوندائے،
ہِک رڑک اچرج ہے ہتھیں
کیہ ڈساں، مُڈھ لاء دی:
جھامبڑ منڈی میوہ رُکھاں توں تلے کھڑوتا ڈیکھاں
بھلا ہُن لگدا کیہ اے،
جتنی وی سرہوں مَلو
رَڑک ایہہ ہتھوں عجوبہ گھنیری تھیندی اے