نہ
مینوں تاڑی مار نہ مار وے اڑیا
مچھر نہیں میں
اینا فرق تے کر سکنائیں کہ نہیں
عمر لنگھائی او
اوہ رِزم لہو لب لاندے
اِک دا دُوجے وِچ رلاندے مار دونہاں نوں دیندے نی
(ایہہ مچھر مکِھیاں نہیں مکھیرنیاں
رس چکھ رس نال رس رلاون ہار فقیرنیاں)
نہ، کھمبیاں تے تصویر لوان دا ٹھرک نہیں سانوں
نہ چینل گرماون دا
سانوں کِیڑ آکھ لے
اُڈن وی آوندائے
بِن تاڑی تینڈی دے
نہ
بھمبٹ نہیں
آتش دا نہیں شوق شہادت سانوں
نہ شاعری وِچ اپنا ناں وجاون دا
جھیتاں اندر نِکے نِکے اسیں تان کے تنبو رہنیاں
نہ
مکڑی کِتھے
اوہدا وڈا وپار ای لُوماں دا
ساڈے تمبو رُوں دِیاں تُومبڑیاں ہوئے
ٹَپرِیاں ساڈِیاں تھل کمرے وِچ تینڈے
جے گَولیں وِچ دِسیئے
روز ہنیری جھاڑن تینڈے دی پُونجھ کے گِھن ویندی اے
نکل ملکڑے وِچوں ہور چا لاونیاں
ساہ اپنے نال،
چِھن لگدا ای
ازل ابد دی جُون چوں باہر وی ایتنا ای آونیاں
تُدھ آئے نوں ویکھن
درس وکھالن تینوں
پڑھن پئے نوں