''ایہہ لے رکھ،
میں نہیں ہُن ایہہ پاونی
مینوں مناہی ہو گئی او،
پِیر بھائی میرے دسیائے
تیری گنڈھی جُتی
سِر اپنے وِچ ای آ وجدی اے،
کِتھے ٹانکا کاہدا لایو ای
اوہنوں خبر اے ساری،
اوہنوں میں دسیائے
تلا ہلیا ہویا سی
لنگھیاں
تُوں سینتر کر سدیائے
جُتی لہا ویکھی اے
کھڑے کھلوتیاں آر وگا کے سار پوائی اے
میں کِھیسے ہتھ پایائے
تُوں سینتر نال ورج اگیرے ٹور دِتائے،
پیر بھائی تیری چُچی اکھ نوں بھنڈی گیائے،
میں نہیں دسیا اوہنوں
چُچ تیرا کیہ کھول وکھا گیائے مینوں
میں کم بزار دے بُھل گیاں
ہٹیاں گُھٹِیاں گُھٹِیاں جاپن لگ پئیاں نیں،
پِیر بھائی نے مِلدیاں سر ای پچُھیائے
'اکھیاں تیریاں نوں کیہ ہویائے
انج ویہنائیں پیا جیویں میں کوئی ہور ہوواں،
کِتھے گیا سیں؟'
مکھے کتے نہیں،
'راہ وِچ کوئی ویری اساڈا ٹکر گیا اے تینوں؟'
کوئی نہیں
میں جد تیرا دسیا اوہنے آکھیا ''اوئے ہوئے
کیہ کُفر کیتا ای
ٹور وٹا دِتی آ اوہنے تیری
جُتی لاہ تے اوہنوں موڑ کے آ
لے کے نوِیں پا'
مُڑ جو کُجھ اوہنے تیرا دسیائے سمجھ گیاں میں
نِندن اوہدا تیرا سچ نتار گیائے
'ایہہ لَے رکھ' والی گل تے تینوں پِیر بھائی دی دسی سُناون لئی سی
ایہو پاونی اے میں
ایہہ پیر میرے ہُن پینڈا نواں کرن تے آ گئے نیں
حق اناالحق کُفر تیرا''