گل میں ماں نال کیتی آہی سہیلیاں دے اَوہر دی
پیٹ جیہناں دے ٹھیک نہیں رہندے
ڈھیر دوائیاں کھاندیاں
جِم وی جاندیاں نیں
'مکھن ہاضمے لئی توِیت ای مگنی'
دسایا نانی دا ماں میری نوں چیتے آہا
پر ہُن دُدھ مکھن سبھ پَیکٹی ہویا اجوکا امّاں
رلا اوہدا کون نتارے
چاٹی ماں کڈھائی نانی رڑکی جیہڑی
مدھانی نیتری
اکھے میں ہتھیں چویا منگاونی آں
جِیری گُجری کولوں
پر ماجھا دسیا ہا تیری نانی گوکا
مگنی بُھل گئی آں'
ماں میری سوچیں پے گئی
میں آکھیا ساہ لؤ امّاں
پُچھ میں بھاء شپے نوں آؤنی آں،
''پُچھیا اگے وی ہا کِسے ایہہ مگنو تگنو
میئیں گنڈوئے ول اُچیچا گیا ہامی،
تُرت ادھا گھنٹہ لا مِیئیں
آکھیا تائی برساتی نوں
دس ایہنوں جَھٹ لا
اج بہوں کاہلی وِچ ای،
ادھا گھنٹہ لا تائی برساتی گل میرے گھتیاں بانہِیں
چُم چٹ پونے گھنٹے وِچ وِچ گل مکائی اوہنے:
'سُن میرے شپُووَن
سرگھی دا تُدھ ہوئیوں سُرجن
کیہ پوہنی اے تینوں اساڈی
سرگھی نوں شام کریندِیاں دی،
ایہا ای اُگھ سُگھ اساں جیہیاں نوں
ماجھ گوک دے بھیت دی گل نہیں
مکھن سَکھن ای دارُو ہوندائے ڈِھڈ ویدن دا
رِڑک مہِین ہوئی اوہدی
بانہیں ہِین منگیندی او'' ‘