کتھا نُور حویلی
(دائی دِینو سُنی صاحبزادے جاوید مقبول کنوں
جیویں آن سُنائی ہماتڑاں نوں)
صاحبزادے نوں ٹھرک سُناونے دا
سُنِیئر میں قدیم
جیہڑی بال جما پُشتو پُشت اشراف سنبھالدی آئی
اکھے ”سُن دائی دِینو
پِچھلی کوٹھڑی کھول کل صاف کیتی
گھر تے ہونائے پُرانا سَو سوا سَو سال
پِچھلی کوٹھڑی کِنّے سَو سال دی اے
آپے جاندی اے
پہلاں آپ گھر ہئی
پُتر پوترے ہور اگوں جمدی گئی
کمرے ہال کمرے
دیوان خانے مہمان خانے
بالا خانے برساتیاں سرد خانے
عمر لنگھدی گئی پِچھانہہ ہووندی گئی
بُڈھی ہو اخیر بُوہا ڈھو بیٹھی
کموں لہنی جو شے گودی جا بہنی
جھاڑ پُونجھ ہونی ہفتے دسِیں دِنیں
پنجِیں ستِیں ورھِیں شیواں ساریاں نِکل باہر دُھپ لَینی
بالاں پُچھناں اوہ کیہدی ایہہ کیہدا
شجرے دَسنے اوہناں نوں وڈیاں نے
کِسے آکھناں ایہہ میں لے لواں
’نہ ہتھ نہ لاء‘
رُسن رون مچنا
کھپنا چُپ کراون لئی ماواں بھیناں
’ہتھ ادب نال لاءاَتے منگ دُعا
دِین دُنی وِچ توں وی درجات پاویں‘
نکڑ دادڑی لوئی
سلُوکڑے دو پڑدادیاں دے
جُبّے دادیاں دے
ٹائیاں کوٹ شیروانیاں پیوواں دِیاں
گُرگابیاں کُھسے پمپ شُو فُل بُوٹ
چِٹے بُوٹ کرِکٹ دے کِلاں والے
ٹرنک ٹوپیاں والا وی کُھلیا کل ڈھیر چِراں پِچھوں
وِچ مخملی کالیاں لال ہرِیاں
چار چِٹیاں کھدری ریشمی دو
کِشتی دار دو نُکریاں گول پنج ست
وِچے کھل قراقلی
محرابی خلافتی تِن دو سِدھیاں جناح کیپاں
سادے گول کُلّے
کُلّے بُرج تِرچھے طِلّے دار اُچے
رُومی لال اِک پُھمنی وِچ گَتا
رُومی پولیاں دو اِک بغیر پُھمن
ہیٹھ ہَیٹ سولا
ڈھائی تِن سِرعام اوہدے وِچ آون
پِچھلے پاسیوں پِھسیا ذرا جیہا
اوہدی پِھس کڈھوائی
سبھ نوں دُھپ لوائی
بُوہا وجیا پِچھلی کوٹھڑی دا،
سُنیائے تھیہہ آہی
وسدا اوتھے ہا مُلک سوانیاں دا
حال لِکھیائے میئیں محمد صاحب سفرالعشق اندر
راج رانیاں دا
وِچ تلاءاِک دسیونیں
نھا مزا مجامعت پاوندیاں سن
نالے حمل کرا دِھیاں جاوندیاں سن
بندوبست جے مُڈھ قدیم دا ہا ایہی آپنا تاں
ویکھ سیف الملوک نوں بُھکھ دربار وِچ کیوں چمکی
پھڑکی کیوں شہزادی جد ٹُر گیا اوہ
پارا اوس تلاءجماع والا
تھرمامیٹروں کیہڑیوں نِکلیا سی
شاعر وڈے آہے دَور آپنے دے
نال ولی اللہ
بھیت رکھ گئے نیں حضرت میاں صاحب سرکار
خادم ہوئے اسیں لازم کھڑی شریف چادر چاڑھنے آں
نہ کوئی مدرسہ
خانگاہ نہ کوئی
بس شہزادی تے شان گمان اوہدا
پہردارنیاں نیں اہلکارنیاں نیں
نہ کوئی ماملہ ٹیکس محصول کوئی
تھیہہ وسیا کیویں
کیوں بے وس ہویا نہیں نیں دسیا ایہہ
چھڈو، قصہ کرو، جیویں آپ اکثر فرماوندے نیں-
ٹِلہ ٹھاہر بنی بَول بَیسنے دی
پٹ پدھرا کر کُرسی لاہی اُتھاں ساڈے وڈیاں نے
پِچھلی کوٹھڑی دی
نِکلے ہیٹھوں کرُنگ کھوپر ننگ مننگ
بھوچھن چُنیاں کوئی
نہ کوئی چولی غرارے سلوار ساڑھی
نہ کوئی اُچیاں اَڈیاں ٹائٹس جِیناں
کُجھ بَھن کرُنگ کر کُوچیاں بُرش پھیرے رنگ سازاں
ٹھٹھر کر کُجھ ٹپری واس لے گئے
پِچھے کھوپر رہ گئے
رگڑ جوگیاں سو کشکول کیتے
نہیں ایہہ ہِسٹری جوڑی تاریخ داناں
ٹُری سینہ بسینہ جو آئی
سُنائی دائی دِینو تینوں
کَل پِچھلی کوٹھڑی کُھلی اے تاں“