''میاں جی
سُندے آئے آں وڈیاں کولوں
ایہہ جگت مسافر خانہ''
''برخوردارم
اوہ گل ہے درویشاں دی
در در جیہڑے ویس وٹا کے بہندے نیں
عالم یعنی سکالر لئی وی ہے ایہہ رہائش عارضی ہی
اوہدے لئی پر جگت مسافر خانہ نہیں
رَیسٹ ہاؤس اے
مسافر خانہ قدیم لاوَقاتی اصطلاح ہے''
''یعنی پُرانے وقتاں دی''
''درست شاباش''
''میاں جی کِتھے ہے اوہ ریسٹ ہاؤس''
''تیرے خیال وِچ کِتھے ہو سکدا اے؟''
''اِک تے میرے مامے دے سوہرے گھر دے کول اے
عین تھانے دے ساہمنے''
''نصف درست سو نصف شاباش
تھانہ نہیں، اوہدا نام ہے حوالات''
''ہوَّا لاٹ جیہنوں کہندے نیں میاں جی؟''
''کئیں سیکشن نیں حوالات دے
ہوّا لاٹ والا
برطانوی دور وِچ زیرِ استعمال سی
ہُن ریسرچ واسطے اوپن اے
دُوجا سیکشن حوالہ آت ہے
جتھے رقم پیام ہوندے نیں
تیجا ہوا لات ہے
جِتھے ہوا لوائی جاندی اے وقتاً فوقتاً
ہور وی کئیں نیں
اِک جیہناں وِچوں صرف لات ہے ہوا نہیں اوتھے ہوندی
عین ساہمنے ایہہ رہائش عارضی
مُسقبل دی مستقل رہائش توں پہلے
آزمائش ہے برخوردارم
جنت الفردوس دی ایہنوں ٹریننگ اکیڈمی سمجھ لؤ
جیہدے تے دوزخ دے وِچکار سڑک ہے برزخ دی''