جاگدے رہنا بَیّو
ہیں، ایہہ کتھوں، ایہہ تے میرے پیو دا واج اے
چوکیدار دا پُت وی چوکیدار ای ہویا، حق بندا اے
چوراں دے پُت ٹھانیدار نیں اوہ وی حق اے
چور آپ ای کھاتے دار نیں
چوری وڈا کاروبار اے اوہ وی حق اے
چھڈ ایویں نہیں پیا چور بنائی دا ہوراں نوں
آپنا حق حلال دا کھائی دائے
توں گارڈ ایں گن اے یونیفارم اے
لکدی بنھی ڈانگ پیا کھڑکاوندا سی پیو تیرا
جاگدے رہنا بَیّو پیو نے ہوکا دینا
گیڑا ماردیاں پھیر آپنے آپ نوں کہنا
''رات سون لئی نہیں ہوندی اوئے رب دیا بندیا
رب رب کرن لئی ہوندی اے
رب رب کردیاں دے جھلکارا جاندائے کرماں والیاں نوں
پُگ جاندے نیں
جاگدے رہنا بَیّو''
تدوں شامو شامیں کھا کُھو کے سوں جاندے سن لوکیں
سرگھی اُٹھدے سن
پیو میرے نے کُفتاں پڑھ کے کھلونا
وِچ تہجد پڑھنی
فجر دی پڑھ کے سونا
سونا کیہ ایویں پہر کو اکھ لا لینی
حاجی صاحب نے کم تے بہنا
ایہنے نہا دھو اردل وِچ کھلونا
حاجی صاحب دا کاروبار سی بمبئے بصرے
بڑا اتبار سی پیو میرے تے
چوکیدارا اردل کم اتباری ہوندے سن
پیو میرے جگراتا کٹنا
جگراتے وِچ غیر خیال وی آ ای جاندائے
ساڈے وانگ نہیں ہتھ وِچ گن تے دل وِچ دھڑکا
جے اوہ آ گئے گن اوتھے کیہ کرنائے
بس جان گئی جاں روزی
اُنج آپس دی اے
ہن آون والے تے دِن ویلے ای آوندے نیں
مرداں نوں بنھ کے
بُڈھیاں بہہ کے
نھا کھا کے
کیش گڈی وِچ دھریا ٹر گئے
نال ای پُلس وی آ گئی
ہن راتیں کون آوندائے
سو اسیں تے اکھ وی لا لئی دی اے
پیو جگراتے کٹدا سی اصلی سردی گرمی
پر غیر خیال وی لازم وِچ نماز ای آوندائے آیا
حاجی صاحب دی تاکی کول کھلو گیا
بمبئیوں نویں ویاہ لیائے نیں سنیائے نچدی سی
ویکھاں پُگدے کیویں نیں میری عمرے
حاجی صاحب کھنگورا ماریا
جاگدے رہنا بَیّو آکھ کے ڈانگ ٹھوکدا گِڑ پیا
دنیں حاجی نے اکھ نہیں لاون دِتی
کھڑے کھلوتے چالیاں ورھیاں دی خدمت مونہہ تے ماری
پِنڈ ٹُر گیا
رہندی حضرت پپلی دے دربار تے جھاڑو پھیر گذاری
ہن اندراں وِچ کیہ پیا ہوندائے
باہر لے جھاتی ماری نہیں اخبار وِچ پھڑیا آیا نہیں دنیں
اخباراں والے جو نال ای اندر ہوئے
جاگدے رہنا بَیّو
خیر ہووے
ہن پیو نوں لگدائے حوراں وِچ بمبے آلی دا جھلکار نہیں بُھلدا
خبرے غیر خیال ای پُگدائے