تحفے نُوں تہفہ کر اگیرے دھریا اے
ہ ح والی دُوئی اساڈے کِس کاری
ہِکا بَھلی اے ہِیکن ہَوکن ہُوکن لئی
ہلوا اسیں تے پکیندیاں کوئی نہیں اپنے لئی
چڑھاوا جے چڑھانا پوے کدے تاں
گولی والی مِٹھی ہ دے نال چڑھا دیساں ء،
ہُکہ چُدھرانی دا وی
اوسے نال ای بھرا دیساں
ک وی کَوڑا وچے رکھا کے،
آہو، ق موٹیرا کیوں پئیاں سنگھِیں پھسائیے،
ک تے پتلا ای پچدا اے
جِس ویلے ہَک نُوں ہِک نال لا ہک ہوونِیاں
تاں ہال کھیڈن تے آونیاں،
کینچی وی پتلے والی کُتردی کٹدی اے
س دا سبُوتا ای سردا اے سانُوں
ث دا پاڑ پواڑا وچ کیوں پائیے
ت اساڈی
کِکلی پاؤندی اے تِتریاں نال پئی
گاون توتے گاوندے نیں اوہدے نال پئے
سنگھ اوہناں دے ط دا کنڈا کیوں پھسائیے،
الف نیتر ہویا کُل اِکائی دی
ایہنوں غیر کیوں کرئیے ع دی عینک کالی لا کے،
ص دی مُٹھ کُھلا کے
سکھنا س سوادی کیوں نہ کرئیے اوہنوں
مُٹِھیں گُھٹیا اوہدا
دبے سِدک دے سَدکے کرا کے،
لِپّی اپنی نُوں سیّؤ
لِپ سٹِک کیوں لائیے
سرفہ مِلاپ دا
بُلّاں نُوں پڑھائیے کاہنوں