سَدّا
مُدتاں ہوئیاں بھُلدا ای نہیں
پہلی وار سمندر سُنیا
اِنجن والی بیڑی کھلوتے پانی اندر کھنگدی
بھَجیاں تختیاں وِچوں تَردی تیل تَری کولوں لنگھدی
اِک سرکاری تھڑے تے لاہ کے پرت گئی
ایہہ کوئی ٹاپو اے
وچ وچ ٹُٹی سڑک نِکی جیہی
نِکے نِکے کواٹر جیویں سپاہیاں دے
چُپ چان، جیویں کم تے گئے ہوئے نیں سارے
کِتے کِتے کوئی کھوکھا ویہلا سِگٹ پان دا
وِچ وِچ پَونی بند کوئی تاکی جھاکدی
سڑک مُکی تے اِکدم اگوں سمندر سُنیا
عجب ڈراونی دُوروں نیڑے آونی
نیڑے آ کے دُور پِچھانہہ مُڑ جانی واج
عجب کِسے ان ہوئے جہان دا جیویں بے انت سنیہا
ساڈی بند دُنیا دے بوہے بھنیندی
دِل نُوں ہتھاں پیراں نُوں
کوئی عجب جیہی کھِچ پا کے کول بلاونی واج:
“اَن گِنیاں اسیں کنیاں کھیڈن رَلیاں ہاں
کنی تھیون جیہنوں پُجدائے
آئے سمندر ہو جائے”