روز شام نوں کولوں لنگھناں
بَرنا ناہم ڈِٹھا، کتابیں پڑھیا ہا
گیزٹیئر انگریزی دَسیندائے
لہور شہر وِچ ناہیں رُکھ گھنے
وَن ہے جنڈ کریہنہ ہے
پانی نیڑے برنا بوڑھ شرینہہ ہے
چشتی تحقیقات1 کریندائے
اِنگلیساں صاحبانِ عالی شان ملاحظہ کر لیویں
تکیہ ہذا مذکورہ میں شرق رویہ
اشجار کلاں ہیں بیری گوندنی برنا سہ تا
روز شام نوں کولوں لنگھدیاں
ناں وی پڑھیا ہوسی
بزمِ حقوق اللہ اسلام پورہ لاہور ولوں ورتائے
رب دے نڑنیویں ناواں وِچوں اِک ناں ہیٹھ پرانی تختی اپر ٹُھکیا
برنا کراتیوا رِلیجوسا کاپا رِڈّاسے
لارنس باگوں رات پرتیاں
چھوہ خشبو جیہی کیہی اے کوئی
تیری نیڑ جیویں
پرت کے تکیم لوء جیہی اُپر، تاریاں دی نہیں وکھری
نِت ملنے جیویں جی دی تک وِچ تیر جیہی سہی ہوئی اَچیتیں
1- تحقیات چشتی: نور احمد چشتی دی لکھی کتاب انہویں صدی دے لہور بارے-
وت چائیں گیم سویرے تے پُھل نہ جھڑن پئے؟
تے کِھڑن پئے تِن پتئیے پَتر،
آکھاں برنا چھوہَر ہے چھوہِر؟
پَتر پاون توں پہلاں پُھل جو پالئے نیں
دونہہ پتیاں رَل کُنجے کَنّے تریجی وِچ بہائی
ترے پتیاں تَن مندر تیرا
دِیوے چڑھن تِر مُکھئیے
کتابیں لکھیا ہا:
ایہنوں مِٹھ کُڑتن چڑھیاں گوہلاں لگدیاں نیں
کتابیں لکھیا ہا
بَرنا بَلنا وی اے
وَرنا وی (وَر مَلنا)
برنا رنگنا وی اے
شہراں وِچ وَرانا وَسنا وی ای اے، لِکھیا کوئی نہیں
نہ ای مُدتاں چِت چیتے وس وِسرنا