''کل نویں تے نہیں کوئی ہوئی یار
اندر بہو تے چھپر چوئے
نِکلو باہر تاں کپّر،
سوچی آیاں
چھوڑ ایہہ کوٹھا شہر جُلاں،
لِمبیا بتھیرا
پکا کرن جوگا آوا کوئی نہیں،
کوٹھا کیہڑا اپنا اے
ڈھیناس تاں ڈَھے پئے،
اساں تے پاہی آں
جِتھاں مجُوری لبھی اُتھائیں
جاء وی سَون دی لبھ ای جاسی سُکی سِنھی،
سَونا تاں اُتھاں وی ہِکلیاں ای اے
اوہ تے چروکی پیکے گئی پرتاوا کوئی نہیں''
''ساتھن میری حویلی دے بال کِھڈاؤندی اے،
اندرے اوہ سُتی
میں بُوہے حویلی ٹِین دے ڈھارے ہیٹھ پیا
سُتّا کوئی نہیں،
ڈھارے دے للکارے وِچوں
ساری رات مینوں تیری واج پئی آئی:
’ساڈے رب دی تاں ایہہ وسائی دُنیا کوئی نہیں
اوہ تے دینہہ پر رات
پیا ہلُوندا اے سانُوں پاہِیاں نُوں
رلو تے ایہنوں ڈھاؤ
وساؤ اوہ جیہدے وچ میں تُوں دا کوئی بھیت نہیں‘