(اوہ کوٹ، اوہ محل سرائِیں، راجہ رانی راج ران کر آپو اپنی جائیں راتیں اِکتھاں ہوئے تے راجے سیج ڈُو سینتر کیتی)
رانی: دھنوان مہاراج- سم جاؤ تُسیں تہاڈی اے
راجہ: تے تُوں
رانی: جاگ کے پہرہ دیساں
راجہ: کیہدے تے
رانی: (ہِک تے ہتھ دھریوس) دھن تُساڈے تے
راجہ: مہارانی، سیج تے تیر میر نہیں ہوندی
رانی: بس تخت تے ای ہوندی اے؟
راجہ: نہیں، تختے تے وی ہو ویندی اے
رانی: تخت وی تختہ وی، دوئے تُسیں مہاراج، چاڑھو اپنے تے جو بھاوے، سرکو ویلے سِر ہیٹھوں
راجہ: تے تُوں
رانی: میں ہوئی تختی
لِکھی کلوکی دھو دھا
قلم کِسے ہتھ دینی آں
(نِکل گئی- اوسے بُوہیوں اِک بانھی اندر آئی اے- جوان کُڑی- نِیوں سلام کر کول ہوئی اے راجے دے)
راجہ: تُوں نوِیں تے نہیں
بانھی: نوِیں ہوون تے آئی سرکار کول
راجہ: میں تے نوِیاں نُوں پُرانا کر سکناں، پُرانیاں نُوں نواں نہیں
بانھی: پُرانیاں نُوں مہارانیاں کر سکدے او
(نِیوں کے پِچھلے پیریں نِکل گئی)
راجہ: رگھبیر……
(اوسے بُوہیوں رگھبیر خواجہ سراء اندر آیا اے نِیوں سلامدا)
راجہ: رگھبیر ایہہ جیہڑی گئی اے ایتھاؤں ہُنے کیہ ناں اے ایہدا
رگھبیر: رگھبیر مہاراج
راجہ: اُچا سُنن لگ پیا ایں - تینڈا نہیں، میں ایس بانھی دا ناں پچُھیا اے، ایہہ ہُنے جیہڑی آئی ہئی اندر
رگھبیر: اوہدا ای ناں پیا عرض کریناں مہاراج- اجکل رگھبیر اکھواندی اے
راجہ: اجکل…… کیہ مطلب
رگھبیر: محل سرا وِچ وِیہہ بانھیاں نیں سرکار، ایس ویلے- ایہہ ساریاں جدوں چاہون ناں وٹا گِھندیاں نیں - پِچھلے پُونجھ دیندیاں نیں مستکاں توں - غلام جاتا ایہہ سرکار دی خوشی اے شاید-
راجہ: خوشی نہیں، مینوں افسوس اے تینڈی نااہلی تے- رگھبیر تُوں موہری ایں خواجہ سراواں دا، محل سراواں دا پربندھ تینڈی ذمے واری اے- بند کرا ایہہ غیرقانونی حرکات- جو سرکاری کھاتیاں وِچ درج نیں اوہا ای ناں رہسن ایہناں دے- جیہڑی ایس قانون دی خلاف ورزی کرے اوہنوں محل سرا توں فارغ کر تے مینوں اطلاع پہنچا
رگھبیر: جو حُکم مہاراج
(اُڑ سلامدا نِکل گیا)
راجہ: (اپنے آپ نال) رتکیر ہے ایہہ بانھی- مورکھاں، جاندیاں نہیں سبھ ناں ایس کھاتے وِچ درج نیں (سیج ول سینتر)
]رتکیر مُڑ آئی اے، اُڑ سلاماں کردی[
رتکیر: کیہ حُکم اے- ہُن آ سکنی آں؟ (سیج ڈو سینتر)
راجہ: رتکیر تُوں اپنا ناں کیوں وٹایا اے
رتکیر: شاید نوِیں من گِھنن مینوں مینڈے مہاراج
راجہ: ایڈے بھولے نہیں تینڈے مہاراج، رتکیر
رتکیر: رگھبیر، مہاراج
راجہ: تینڈی اکھ پئی دسیندی اے تینوں کِسے پڑھایا اے کُجھ- مہارانی دِیاں بانھیاں وِچ تے نہیں بہندی تُوں؟
رتکیر: میں تے ایس سیج دی پڑھائی آں سرکار- مینوں ہور کوئی کُجھ نہیں پڑھا سکدا
راجہ: (تلوار کڈھ لئی سو) رتکیر سچ دس تُوں اپنے آپ نُوں رگھبیر کیوں اکھوایا- تینوں خواجہ سرا نے حُکم سُنایا اے؟
رتکیر: (اگیرے ہوئی اے) مہاراج مینوں اِک واریں ایہنوں چُم لین دیو (سیج ول سینتر)- مُڑ مینوں فارغ کر دینا، نوکری توں ای نہیں، زندگی توں ای، ایس تلوار نال
(سیج نُوں پلم چُمیاس- راجہ اوہنوں اُٹھاوندا ہے- اُٹھدی نے داء مار راجے نُوں مُونہہ پرنے ڈیگ دِتا تلوار اوہدے ہتھوں چُھٹ گئی اے- پنج کُڑِیاں اندر دھائیاں نیں - اِک نے تلوار نپ گِھدی اے- راجہ اُٹھن دا جتن کریندا اے- ساریاں اوہنوں ڈِگے نُوں کَڑ دِتا اے، نال آندیاں زنجیراں وِچ-)
راجہ: (کِلّھ کے) رگھبیر……
رتکیر: حُکم مہاراج، رگھبیر ایہہ تہاڈے کول……
(راجے دا مُونہہ بنھ دِتونیں )
(2)
(جُھنڈ رُکھاں دے- وِچ وِچ تھاں موکلیری- وَنّا تے رتکیر آئیاں نیں )
رتکیر: سونُو…… (آ گئی اے)
سونُو کِتھے او تُسیں ساریاں
سونُو: لُک ڈُھونڈن پئیاں کھیڈنیاں ……
گونی…… (آ گئی اے)
نہارو…… (آ گئی اے)
نہارو: امرتی، اِتھائیں ہاں ساریاں (امرتی وی آ رلی اے)
امرتی: اِتھائیں، سُرگل اِدے (سُرگل آ گئی اے)
وَنّا: نی اڑیو، میں ہاں وَنّا
رانی ہوون چھڈ میں تختی ہوون دھاریا، پھٹّی آکھ گِھنو- پوند میں دھوتی کلوکی لِکھی، مل گاچنی- رل کے تہاڈے سنگ راجے نوں ڈھایا تے ڈک دِتا- وت قلم تہاڈے ہتھ دِتی، تُساں لِکھو جو لِکھنا اے
رتکیر: اساں لِکھنِیاں ہاں: وَنّا نُوں اساں راجے دی تھاں تخت بہایا
ونّا: راجے دی تھاں؟ اوہ کِتھے گیا- چُھڈا نہ گِھدا اوہدیاں وزیراں امیراں سپہ سالاراں، تہانوں بندیوان کر کے، تختے چڑھا کے؟
رتکیر: وزیر امیر سبھ نکو نک ہوئے پئے آہے اوہدے ورتارے توں
امرتی: خلقت اوہدے دھرو دِھگان کنوں اَک تھک گئی آہی
سونُو: ہر دم دھڑکا رہندا ہا خلقت دے آکی ہو اُٹھ کھلوون دا- سبھ نے تہانوں تخت دیون منظوریا- تُساں نِیاں دا راج ٹوریا
نہارو: کچہریاں وِچ انصاف تھیون لگ پیا
گونی: کار وپار نیم دھرم سِر ہوون لگا- لاہا پھُلن تے آیا، چوکھا ہوندا گیا
سُرگل: چوکھا- امیر ہور امیر ہوندے گئے، غریب ہور غریب
وَنّا: تُساں مینڈیاں صلاح کاراں تھی گئیاں - تہاڈا درجہ وزیراں امیراں تِھیں اُتے ہو گیا- کُجھ تاں من گئے تہاڈی حاکمی- کُجھ تہانوں لاہون دے متے سارن لگ پئے- کُجھ نے تہانوں آپ یا اپنیاں پُتراں نال ویاہن لئی نائیناں سد لئیاں
رتکیر: اساں لِکھنیاں ہاں: وَنّا تخت تے بہن توں انکار کر دِتا- اساں تخت ای مُودھا مار دِتا
گونی: وَنّا اساڈے وِچ رل گئی
سُرگل: امیریاں وزیریاں مُکا دِتیاں گئیاں
سونُو: مال منال دا راج ٹھپِیج گیا
امرتی: کرنہاراں نُوں اوہناں دی کرنی مِلن لگ پئی
سُرگل: سبھناں کرنی سانجھی کر گِھدی
نہارو: جیوندیاں جئیاں پہلی وار…… کہ خبرے جُگاں مگروں برابری تے پیار دا جِیون چکھیا
سونُو: اندر باہر نواں تھیون لگ پیا- محل رہے نہ محل سراواں -
گونی: جنے دی چَودھر مُکی- جنی جنا پہلی وار کہ خبرے جُگاں مگروں اِک سار اِک سُر ہو مِلے
نہارو: ہُن کوئی شے کِسے دی مِلکھ نہیں - اپنی ہستی وی نہیں - واء پانی بھوئیں بھا سانجھیاں نیں تے سبھ ہونداں وی-
امرتی: سبھ جی ''میں'' دی جکڑ توں چُھٹ گئے- کُل '' تُوں'' ہے- جی دا جی نُوں مِلن کُل نُوں مِلن ہے
وَنّا: پئی ویکھنی آں - مینڈے تے ای نہیں لِکھت لِکھی ایہہ گئی- سبھ جنے سبھ جنیاں تختِیاں نیں اَتے قلم وی ہر ہتھ وِچ ہے
رتکیر: ہتھ قلماں وی نیں تے کَر وی نیں - جو لِکھی سو کرنی ہو گئی
(ستاں رل نچ گنویا نیں )
کیہڑے راہے پئیاں تے کِتھے اپڑ گئیاں
دم دھڑ تھئے نقارے
لہہ گئے چھجے کنبن چُبارے،
کیہڑے راہے پئیاں ……
ہے ہتھل دِلاں دا دھڑکن میلا
تریڑ تریلی قِلعیاں دِیاں فصیلاں نُوں جَیں لائی اے
اوہ دِل پئے دسیندے نیں
اساں وکھ وکھ ہو سہیڑی چاکری
اُچیاں گھراں دی راکھی لئی اندر توپاں دے جُسّے ڈھالے
کیتی اپنی وِس کرن لئی تختاں تے پھنیئر بہالے،
ہُن اِک ہو آندا اے ویلا نویلا
جَیں ہر چِھن اندر سُگندھ سَنیہہ رچائی اے
کیہڑے راہے پئیاں تے کِتھے اپڑ گئیاں
کیہڑے راہے……
نی اپڑیاں کِتے نہیں،
لگیاں ودو،
راہ ایہہ ساہ ہے
رُک رُک آؤنا جانا
راہ ای پڑاں ہے
ایہو نانہہ ای ہاں ہے