کم توں گھر ول جاؤ
تے راہ وِچ موڑ اوہ آؤندا اے
نِکی ساری اِک دِیوڑی جیہی
جِتھ بلدی چروکی آئی اے،
سیانیاں دَسیا ہویائے
لوء اوہدی ولا کے لنگھو
راہ کُھنجاؤندی اے،
سُرم سلائی لاٹ اوہدی
اکھیاں جیہناں وِچ پِھر گئی
اوہناں ورانے اپنے کر کے
اپنے ورانے کیتے،
تیل پُونی اوہدی کِتھوں آوندی اے
ایہہ وی دس ہے سیانی پَوِتّر
وڈیاں دیاں پَڑوَڈیاں دی،
اوہا پاوندِیاں نیں
وسدے جیہناں اُجاڑے،
اوہ کون نیں
دِھیاں بھیناں ہو گھر گھر بِیبا
وسدِیاں جیہڑیاں سہتیاں نیں