اُولُو داغ پہاڑ دی گل
(جیویں ناظم حکمت جیل دے اندروں کیتی سن سنتالی وچ)
سَتاں ورھیاں توں
میں تے اُولُو داغ پہاڑ پئے اِکدوجے نوں تکنے آں
اکھیاں چ اکھیاں پا کے
نہ ایہہ سُوتر ہٹیائے نہ میں
ہاں اِکدوجے نو ں جان گئے آں چنگا
سبھ جیوندیاں جِئیاں ہار ایہہ ہس وی لیندائے
پاگل وی تھی ویندائے
کدیں سیالی راتاں اندر جیہڑے ویلے پَچھوں وگدی اے
سَنے آپنیاں اُچ پدھراں دے
جمیاں سَراں دے
تے برف چَدرے چِیل دے جنگلاں دے
ایہہ سُتا پیا رِڑھ پوندائے
تے ایہدی ٹِیسی اُتے وسیندا بُڈھڑا
داڑھا جُھلیندا
لَکدی پُھلیندا
شُوکدی واء تے چڑھ کے ہیٹھ وادی وچ لہندائے
وت رُت وساکھ دی پرتے تے دُھپ نِکلے
تاں ایہہ اُٹھدائے
نواں نکور جہان ہووے کوئی ہور جیویں
ڈھیر وڈا، گھن پَسریا، نِیلا
کُھل رَسدا خوش وسدا-
وت کدیں کدیں وچ اوہ دینہہ آوندے نیں
جدوں ایہہ سوڈے دی بوتل اُتے اپنے چِتر جیہا پیا لگدائے
ایہدے اُتے پئے ہوٹل اندر میری نظر تے جاندی کوئی نہیں
پر پتہ اے مینوں اندر پیریں تختے بنھ کے برف تے تِلکنہار سوانیاں
تِلکنہار ساﺅاں نال
کَونی اَیک دی چُسکی لا کے ٹھرکدِیاں نیں پئیاں
وت اوہ دینہہ آوندائے
جد کوئی ایہدا کَوڑے متھے والا پنڈورا واسی
آپنے گوانڈھی نوں
مَل درگاہ دے در تے کوہ کے
ساڈے کول پراہونا ہو ڈُ ھکدائے
گھر دے کَتے اُنے دا پِیلا تمبا پائی
چکّی نمبر اکہتر
پندراں سالاں لئی