''سچی دسّاں
جیہڑے بُدھ بن ساتھوں مَل چُھڈیندے نیں
اساں اشوک ، بن بھگت اوہناں دے
اوہناں نوں بُھگتا دینے آں،
کیہ کرئیے
اوہ مَلّ نوں دُکھ دسیندے نیں
ایہو دُکھّ سُکھاندا ہویا سانوں۔
اوس اشوک دی سُن لئو
وڈھ ٹُک لَکھّاں ہِند نِوَائیوس راج بنائیوس
سمجھ گیا
ایہہ پُٹھی پَٹی پڑھیندے نیں پئے
جَنی کَھنی نوں
بُدھ ڈھنڈورے
وستی وستی لوک نوں
پئے پسمیندے نیں
مالک کنوں چُھڈا مالکی
پا لَیسن ایہہ سانجھ بھنڈارے
اوڑک راج مُکا دیسن۔
سوچ دوایا ہوکا
‘حضرت بُدھ نوں مُرشد مَنیئم لوکا ‘
تھاں تھاں اوہدے نام سوہنے دے مندر پائے
بھِکھو وچ بہائے سرکاری،
دَھن والاں نوں آکھیا پُترو
ہو اگوں ہُن چاڑھ چڑھاوے پِچھوں لئو شِرینی
امن اہنسا فوج بنا کُل جگ تے پھیری
اوہا ڈھنڈورے ڈَگے ڈھول چا بھرتی ہو گئے
’ ہر شے مُرشد دی ، کیا میری کیا تیری ‘
بس ، پھیر کیہ، سمجھو بُدھ کم سُدھّ تھیا''