بیٹھی رہنی ایں
سدا توں تاکی اپنی وِچ اِکلّی
نی کالیئے سنترئیے
ہو پرچھاویں ورگی،
ایہہ چونکی جیہڑی ذمے تیرے کِسے لائی ہوئی اے صدیاں دی
ہیٹھوں ایہدیوں لنگھناں میں،
ورانی تاکی
تیرے اکلاپے دی
پِیلیاں چُپّاں اندر جَڑی،
اٹھے پہر میں ہیٹھوں لنگھناں،
سدا اکلیئے نی سنترئیے
چُپ چپاتا چڑھدا کالا چن کِتے
ٹُھکی نظر نال تکنی ایں وِچ وِچ
پڑھنی ایں یا چُڑ مُڑیاں اخباراں
یا ہولی ہولی ترونکنی ایں
پُھلاں ادھ مویاں نوں
مویاں اتھراں نال،
چھڑی ایہہ ہنج فوج ای آہی حکم تیرے وِچ؟
ایہہ ہنج مُلک ای آہا
بِنا تسیہے کٹیوں جِتھے توں وڑ سکیوں؟
دُھپ تیری تاکی اندر کدے نہیں وڑدی اڑئیے
بس ایہدے پتھیرے متھے تے آن کے
ٹھنڈی ہو ویندی اے،
تے بتی گلی دی
اپنے پھاتے چانن چوں مساں ایتنا ای سَٹدی اے اندر
جیہدے نال لُگ پرچھاویں
بہہ دوالے تیرے جاون،
ویلا آپ کدیں
تاکی تیری اندر نہیں لنگھیا
نہ اندروں باہر ای آیا اے
پیا رہندا اے ہو کے دوہرا
اپنے آپ دے اُتے ای
موت اپنی نوں ملدا
تاکی تیری دی سردل تے،
تیرا کم نی سنترئیے بس بہنا اے
بے ستیاں نظراں نال جھاتنا
لنگھدِیاں کاراں
نشے ویچدے مُنڈے اپر ڈھکیاں دے،
وال بنائی کھڑیاں کُڑیاں
بھریاں بُلاں نال
جیبھاں چُسکدیاں،
تینوں تاکی سپاہن کر بھرتی
ڈیوٹی تیری لائی کِسے
پہرہ رکھن لئی سلیٹی دُھپ اُتے
وِچ گٹر دے لمی جیہڑی پئی ہوئی اے
موئے کُتے بلی یا موئی مجھ وانگوں،
رضاکار کر کیہنے تینوں کھلیہار دِتا اے
دھولیاں والے پرچھاویں تے
پہرہ دین لئی؟
تِڑکیاں تاکیاں دی
سارجنٹ ہوئی توں
پتھر وردی پائی کھلوتیئے جمعدارنے
اپنی پوسٹ تے جَڑی ہوئی ایں
وِچ ویہل وِتھ نہیں کوئی
کدوں ارام جھٹ کرنی ایں توں
تے سَونی کدوں ایں اڑئیے
(انٹار مُبیری)