آپا مار پٹاکا
اسیں کٹھے بھرتی ہوئے آں دوئے
کٹھیاں ٹریننگ کیتی اے
کدیں اوہ اگے کدیں میں اگے
مار وی کھانی کھار وی کھانی
میں گُنگ دام اوہ گلاں دا گالھڑ
ایہو بھیت وی آہیا خورے یاری دا
آکھ ویکھ کے ڈیوٹی نال لوانی
وکیل ِچھڑے نیں جدوں دے اسیں ہائی کورٹ دے آل دوالے ای رہے آں دوئے
کل اوہ ڈاکخانے آلے گیٹ تے آہیا میں اُرلے تے
کِھسکدا اوہدے کول ٹُر گیاں
گلاں اوہدیاں
“میں بِجُو نوکری چھڈ جانی او”
مینوں بِجُو ای آہندا آہیا رات جگاندا جو ساں اوہنوں
اکھے “کل وکیل نوں وھائی اے اُتوں تِلکے نوں سَر کُھل گیائے اوہدا
گھُٹ نشے دا آیا نالے ای لہہ گیا ئے بِجُو، شِریکہ ہویا
کالے کوٹ نوں لگّے لہو دا پتہ نہیں لگدا
وڈے کرونڈیئے ہوندے نی ایہہ سُور دفعہ دے
اسیں پِنڈاں تھاواں دے لوک آں بِجُوا ایویں دھگانے ویر کمایئے
آہندے کیہ نی
چیف بہال اوئے ساڈا جیہڑا لاہیا ای
اوہ پُچھ کے گھروں تہاڈیوں آیائے جیہنے لاہیائے
ججّاں نال تے ایہناں دی اسیں جرح جراحی سُندے ای آئے آں
وِچوں ٹانکے ہوندے نی بھاویں
ساڈے چیف وی لہندے ای آئے نیں بَھلے بَھلے
اسیں تے کدیں نہیں کُسکے
کُسکن کیہڑے بھا دا بِجُو
ٹھاہ سلُوٹ دی پھِسّی نہیں تے اَکھ پیٹی تے وجّی نہیں
دھوتی دال وی مَسراں دی ہُن سَو پئی ٹَپدی آ بِجُو جانی
ٹریفکِیاں دے کوٹھے وگدے نی
مہنگِیاں دے تُوں مَیں دَلّے سَستے، پَلّیوں پاؤ واپسیاں
اجے تے مُنڈیاں دے پَٹے نہیں کھولے مَولبیاں نے
ڈریکٹ اوہ لَیندے ای بنٹیاں توں نیں
پِنڈ دی گدوں سوادی نہیں سی ایہدے نالوں؟
ٹُکّر تے ٹُھنگ ای مَردے چپہّ، اسیں تے وردی پِچھے آئے ساں ہے نا بِجُو
گالھ مندا نہ کریں تاں وردی رہندی آ
گالھ مندے لئی مویا مُکا تاڑو تے اوہ وی سِدھا ہو پیندائے
اگے سُنیائے ٹانگے آلیاں دَھول پچا جانی
پر پَتّی ویلے سِر اُگّل دینی
ہُن روک نہ پِھٹ پِھٹِیا کوئی
ماں بھین تیری پاڑدا چڑھ جاوے دا فُٹ پاتھ تے
نمبر کر نہ نوٹ تے ماما ٹھانے کھلوتا ہووے دا اگے
پیٹی تیری تے اپنا اُسترا لاون لئی
میری منیں نا کٹھے وردی لاہیے دوئے نہیں؟
توں کوئی دل دی دَسنی اے بِجوا میریا؟
بیڑی پے گئی ا ے گُنگے دی یاری سانوں”
میں پیا اوہدیاں سُنناں اُتوں حوالدار آیائے
مینوں آہندائے تیری تے پرلے گیٹ تے ڈیوٹی لائی سی اوئے ایسے گلّے
رات بتھیری نہیں ہوندی تہانوں اکدوجے تے چڑھن لئی ڈھیکیا
میں پرلے گیٹ تے پُجاں دُڑکی پِچھوں پٹاکا بول گیائے
آپ تے سَٹ کے ٹُر گیائے وردی
میری جِیبھ کھول گیائے
کل دی کیس چ نہیں پئی وڑدی