پارک پہاڑی
بنچ دے کنڈے اَڑے اوہ دوئے
چھوہَر دیاں لُوں مُچھاں
سلیپر میلی پَینٹ پُرانی
کوئی پنجِیاں تریہاں دی چھوہِر سادی
اَدھ حجابِیں بدّھی
ویکھ چاکھ کے آل دوالے
بُل چَکھن
جَھٹ وکھ ہو چوپھیرا تاڑن
اِک تہمت میلی چپلی داڑھی
بُہتی چِٹی تھوڑی کالی
ہتھ سُکّی چھمک دھریک دی
لنگھدا کول کھلو گیا
”ڈٹ کے چُمو اِک واری سوہنیو
تھاں ماردیاں جے کوئی کُجھ کہے تہانوں“
چھوہر سنگیا
چھوہِر اُلّری ٹُٹ کے جُٹ گئی
”جیو، سدا کُھل کھیڈو پِیﺅ آب حیاتی
اِکو چُمّ وِچ عمر لنگھاﺅ ازلوں ابد تائیں،
ایہہ لئو، کول رکھو
جیہڑا کوئی اوکھا ہووے پاہرُو ٹاہرُو
اِک دھرکونا دھرو تلی تے اوہدی
لے جا لاگ ای تیرا“
اوہ ٹُر گیا-
دوئے حیران پئے اِک دُوجے نوں نِیجھن
جیویں اندروں پئے لبھدے نیں اوہنوں
پھڑ دونہاں مُڑ اِک دھرکونا تلیاں میل لئیاں
پتہ نہیں لگا ہسدے نیں پئے کہ روندے