دو رُکھ آہے بھین بھرا
آر سڑک نے پار سڑک نے
دینہہ ہَس راتیں وَسنے
رُکھاں وِچ ایہہ جائز نجائز نہیں بندیاں والا
جائز نجائز اوہناں نا ہور اے
اوہ رُکھ بولی آوے تاں سمجھے کوئی
رُکھ بولی رُکھ ہوئیاں آوے
جِتنا چِر رُکھ رہو پئے بولو
نہ رہو بُھل جاوے
اس جوڑے نی آل اولاد ہوئی کِیڑِیاں چِڑِیاں
گل نِکل گئی، چڑھے جلُوسی
ہِندواں سَنکھ وجائے
مُسلماناں تکبیراں واہیاں
سِکھ کرپان وکھائے
رُکھاں نی بُھل کے آپو وِچ جلُوسی بھِڑ پئے
کرفیو لگ گیا
سن سنتالی وگ گیا
کوٹھیاں خالی مَلن جلُوسی چِھڑ پئے
بھین بھرا والی آئی گئی ہو گئی
ہُن کِسے وی گل تے جدوں جلُوسی چڑھنے نیں
آر سڑک نے پار سڑک نے
کِھڑ پینے نیں رُکھ بولی نے اکھر
اکھاں والے سُنگھ اوہناں کی پڑھنے نیں