اساں سوچیندیاں آئیاں
سُتی کلا ساڈی کال ای آن جگاسی جدن وی آسی
جاگدی پل پل سانوں بھچھیندی آہی
''میٹیاں مُٹھاں کھولو
نیترے1 جھڑ ویسن''
وڈیاں اوہدی واج نوں ساڈی جان کڑکنا
''چُپ کر جا
مِلدی پئی او بانگ
گِچی مروڑ دیسوں''،
اج اچیتی بولی
سُتی کلا مَلیندی اکھیاں اُٹھ کے:
نی میں ای ہاں
جیہدا آون اُڈیکدیاں ہو
الف نوں اندروں باہر کر مینوں کلا کیتونیں
''بھال'' نوں جیویں ''بھلا''
1- نیترا= نیانا= رسّہ جیہڑا ڈھوراں دے پیریں بنھدے نیں اوہناں نوں نسن توں روکن لئی-