فرید بھنڈار

ساڈی سانگ سنگت وِچ مُڈھوں ایہو طریقہ ہا

اُپے گائیے ساز وجائیے

سوچ سار دی سانجھ جیہناں نوں جاپے اوہو کار کرن

اسیں کوئی پروفیشنل کسبی نہیں کدے سدیا

اسیں نہروں پارلے پِنڈ جانا ہا

کل سانوں اوہناں بلایا ہا

وار کھیڈن لئی

ٹُرن لگے تے نامو ماندی پے گئی

واجا کون وجاوے

گاون سِکھدا ہا اِک ساتھن دا بھائی

گھل دِتا اوس آپنا واجے والا

کیہ کردے بنی مجبوری

فلماں والیاں نال وجاوندا ہا

آپنے سیاسی گاون دے میں بول اوہنوں سمجھاون لگی گا کے

واجا چھڈ کے مینوں ویکھن لگ پیا

''بی بی تہاڈی واج وِچ اوہ گل ہے ویہہ پیسے

دس پیسے جیہڑی نور جہان وِچ آہی

مہینہ دیو نا مینوں ویہاں توں چالی کردیاں 

دو مہینے دیو تے اسّی، تِن دیو سو

ایس واج دے نالدی ہور نہیں ایس ویلے

میرے کولوں کیہ لُکیائے سبھ نال میں ای وجاونا ہوندائے

اوہدی گل میں پئی سنی

پر اکھ اوہدی مینوں ویہہ ورھے پہلوں ویکھی

مکھن درزی والی جاپے

میں سُوزی ہوراں دے گھر کم کردی ساں تدوں اُتلا

دسویں کر لئی آہی

گھراں چ اُتلا کر کر اگوں پڑھن لئی خرچ بناوندی ساں پئی

مکھن درزی چالیاں پنتالیاں دا ہونائے

وڈیاں گھراں وِچ پِھر کم کردا ہا

مینوں آکھن لگا کم سکھ لے

گھر بہہ کے پڑھ دِن رات پئی

بس گھنٹہ روز دا لایا

میں آکھیا ٹھیک اے

''اول ناپ لینا سِکھ

جیہنوں آ گیا اوہو درزی باقی فرضی''

فیتہ کڈھیوس ''چھاتی کھول نا''

میں کہیا اوہ کیوں 

''ماس نوں چھوہے نہ فیتہ ماپ نہیں ہوندا

آپنی مالکانی نوں پُچھ لے''

میں سُوزی نوں دسیا

آکھن لگی سارے شہر وِچ ایہہ بدنام اے

جتھے جاندائے ایہو جیہی گل کردائے کوئی نہ کوئی

کئی واریں جُتیاں کھا بیٹھائے

پر کیہ کرئیے

ایہدے نالدا کاریگر نہ ہویا

اگلے دن میں اوہدی دکان تے ٹُر گئی

''کیویں آئی ایں''

''کم سکھا مینوں''

''جا جا میرا ٹیم پئی کھوٹا کرنی ایں 

دکانداری اے کنجر خانائے کُڑیاں نوں کم سکھاؤ''

میں کھیہڑے پئی رہی اوہدی اکھ وِچ کل والی گل نہ آوے

اخیر میں آکھیا سچ دس کل تینوں ہویا کیہ ہا

آہندائے ویتر ساڈی کاٹ وی ساڈی ساڈا گنڈھ تروپا

ساڈا پوایا پا کے ایہہ مستاون کھسماں یاراں نوں 

ایہہ جونیں اسیں بنائیاں نیں 

اسیں ہانڈی چوں لون نہ چکھیے پکے کیویں 

سانوں پتہ اے ساڈا رِدھا ہوراں کھانائے

چُھری کنڈھے نال

توں ساڈے ورگی ای میلی

تیرے چوں مینوں اوہناں دی خشبو دا ایویں دھوکھا جیہا نہ جاپے

تے میں تینوں تُھکاں وی نہ

سچ پُچھیائے تے سُن لے

بھولی نہ بن

بُوٹ جیہناں دے پئی لشکاونی ایں مونہہ ویکھن لئی آپنا

جانگھیئے اِستری کر کر دینی ایں 

اوہ بن ٹھن پئے پَسماوندے نیں بنیاں ٹھنیاں نوں 

میری منیں تے لُون چکھ لیا

ذرا نظر کر کانی، ویکھیں کانے ہوندے

جیویں ساڈے وِچ ہے اوہناں دی خشبو دا ہابڑا

اوہناں وِچ ساڈی بو دا ڈر اے

پر کدیں کدیں بوسنگھن نہ تے کیوں خشبو نوں چُنگھن

ایہہ کر کے آویں تے کم دا کیہ اے

کم تینوں آپے آ جانائے''

اج واجے والے دی اکھ تکی تے جاپے آہندائے

بھاویں ولیتوں پڑھ آئی ایں 

پروفیسر بن گئی ایں 

ہیں تے ساڈے ورگی میلی

واج کیہی تیری گاون کیہ

میں تُھکاں وی نہ جے تیرے چوں 

مینوں اوہناں دی خشبو دا ایویں دھوکھا جیہا نہ جاپے