ڈھیر سَنیر اے چارے پاسے
وچ ماں میری
بیٹھی پیڑے کر کر دیوے مینوں نالے رووے
میں سَنیری روٹی بھُنجے تپے توے تے لاواں
لگدی روٹی وچوں بوٹے اُگدے نیں
پھُل کالے پھَل کالے
وڈا بھرا میرا آیائے ہتھ وچ ڈول لئی
‘‘ایہہ بلیک ورنٹ اے تیرا
جا ہُن اسیں کیہ کر سکنے آں’’
باہر پُلس اے
ہسپتال دا بُوہا اے کوئی
نرساں وچ میں رَلیا رَلیا نکل گیاں
لائینو لائین دوڑیاں چڑھ گیاں چلدی گَڈّی
پارٹی یونٹ توں فون آیائے
‘‘راہ وچ جدوں چنانہہ آوے توں چھال مار جائیں
اوہنے سمندر جا وڑنائے توں نالے وڑ جائیں
ورکر آپنے آ ملن گے تینوں’’
اجے چنانہہ نہیں آئی
گَڈّی ہولی ہو گئی اے
پُلس آن چڑھی اے
ٹِکٹاں چیک کردے نیں
میں کالا پھُل پھڑا کے نس پیاں
گولیاں ماردے مگرے نسّے آئے نیں اوہ
میں چنانہہ وچ چھال مارن دی کیتی اے
پانی کوئی نہیں
ریت ای ریت اے
دَوڑی جاناں
اگے سمندر آگیائے اِکدم، سنگھنا جنگل اوہا سنیری پھُل پھَل کالے
فوجی وڈھدے پئے نیں
کوئی دسدائے کالا باغ ڈیم پیا بندائے
ساری خاب وچ نال ای ڈر کوئی ہور اے
سنگھنا بَدّل ہُن ورھیا کہ ورھیا
میں ویکھیائے جِس دن پیٹ خراب ہوئے نا
یاں پیسے کول نہ ہوون سگرٹ جوگے
پھیر ایہہ خاباں آوندیاں نیں