کِنا کو پڑھ گئے او
ایم فِل،
آہو ایم اے تے اجکل اَیویں ہویا
لِکھدائے کوئی اگے؟
پِچھلے ناں نال بنھ بی اے سَوں جاندے سن
دوہتے میرے نوں ماں کرایائے
ہنڈ گئی اوہ تے
ہور امتحان دا تیل ملائی پِھردائے ہُن اوہ
لہن نوکری کھاڑے،
ساڈا؟
ایہو کم جے
ہا کُرسی اُننے دا
اگوں ایہدے کم نیں
لاہی بہالی
پیراں پرنے کیہڑی حکومت چلدی اے،
آہو ہے برِیک ایہہ وی اوسے وانگ
سویٹر بُڈِھیاں دا ہو گیا کُرسی اساں بُڈھیاں دا
اوہ گھر
باہر اسیں
گلیں لگے پئے توڑ نبھانے آں اُندے ،
نہیں
بَیت دِی چِھل جے
کانے بَیت وچ فرق اے، کھنڈ شہت دا
وڈے ساڈے کؤچ دیوان وی اُندے سا جے
پڑھیا ہونائے تُساں
وڈا کم ہا
وکھ ٹیشناں اُتے ویٹنگ رُوم ہونے
افسر گورے آ لک سِدھا کرنا،
لک دا کم ہا
اوہدا سِدھا رکھنا لِفانا ساڈا،
نہیں اسیں نہیں لاہوندے
ہتھ نال پہلوں لہندی آہی پھیر مشیناں آ گئیاں،
مُشکل؟ اوہ تے بَیت نوں پُچھو
جِس دی لہندی اے پُٹھی
اسیں تے اینا جاننے آں
چِھل لہے تاں چِھلڑ بندائے، دُنیا تے راج کردائے،
چلّے او
اُرانہہ ہوو نا
بَیت نہیں اجکل ہوندا کوئی
ہوندا سی کدیں سانوں سکولوں کڈھن لئی
ایہہ پلاسٹک جے
پلَہ سَٹک
اینا ای سچ جے تھلے جو اوہدے اوہا اساڈے
جاؤ ہُن
متاں وعظ میرے دا چینل کالم لمک پوے
مار تے رہنے آں
گل چوں گل نِکلدی آوے
سُنئیر ٹکرے سہی
جاؤ
ہوئی بَیت چِھلڑ بِسمہ اللہ اساں ہتھ کیتے تُرت اگیرے
پڑھائیاں مانو
اساں وی ایتھے ای آں
ویہنے آں تانا کیہڑا تنیندے او