فرید بھنڈار

کھانا پکاون دا کم کریندی اے

وڈیاں گھراں وِچ،

پچُھیئم اِک دِن لنگھدی نُوں

'' سُنیائے تیری زِویں سی اپنی

گھر وی اپنا سی،

'' آہو''

'' پھیر کیہ ہویا''

'' ویاہ سُکھالا گھر بھال میں کر لیا

جو کُجھ میرے ناویں ہا

میرے کولوں اوہنے اپنے ناویں کرایا

کُجھ چِر ٹھہر کے ویاہ اِک ہور چا کِیتوسُو

ٹُکر پکاون دے کم تے مینوں لایا

میں بولی تے آکھیوسُو

آئے گئے نُوں تاڑدی رہنی ایں

جِند جے نہیوں گوانی تے ایہہ لے، ٹُر جا

طلاق اوہنے میرے ہتھ پھڑائی

میں اُٹھ باہر آئی سوچدی

جُوا میں کھیڈیا سی اکھیاں نال

داء1 پرتایا2 نہیں سریا3

میں ہار گئی''

1- داء= چال، ڈھنگ- 2- پرتایا= بدلیا- 3- نہیں سریا= کامیاب نہیں ہویا-