پَیر پَیر اساں ڈَھلنا پربتاں تِھیں
وچ وچ چھال وی مارنی نِکی جیہی
جھال ہو جُلنا
ہسدِیاں کھیڈدِیاں
ادھ پدھریں لہہ
کِکلی پاونی نال پہاڑِیاں دے
پسر سُنگڑ جانا
سُنگڑ پسر جانا
انت آن مدان دے وچ وگنا
پل پل دھرت دا سنگ سنبھوگدِیاں
ساگر تھی وینا
اُڈ ہو گھنیئر انبر پندھ کرنا
آہا پندھ ایہہ کیہ
سانجھ واس دا خلق سنگ رنگ آہا،
کندِھیں آن وسیاں
جیہڑے بیٹ وتر اساں سرک گئیاں
اوہ شہر ہوئے
کار ونڈ ہوئی
کرنہاریاں چوں کرواونے ہو کُجھ اُسر کَھلے
جوڑ سانبھ دا ویہل وسیلڑا ہوئی
بیٹ پیٹ ہوئے مَل مارناں دے
آپھر آکڑ اوہ اسانوں آکھدے نیں
تُساں کیوں ایہہ ویس وٹا ناری
گھیس مار ٹُرے
میاں تُساں دریا
کمّی ساڈے
چُوڑھے جھیور مالی
بندے بن کے ٹرو،
آ تاء وچ اساں شہر روڑھ دینے
سڑکاں پٹنیاں کوٹھڑے توڑ دینے،
بنھ مار ول سانوں جُوہاں مُلکھ ہوئیاں
ٹوٹے کر مَل وانِیاں بِھڑن پئیاں
ڈک سانوں دھگان جِھیلاں ایہناں بھریاں
لَک لَک ہُن آن سُکائیاں نیں
تَس ڈُھک پئی اے
اساں سُنا آئیاں:
جیکر ہے صلاح دھرت جِیونے دی
گُھٹ سار امرت ہِک پِیونے دی
اساں جو آہیاں
تُساں ہو ویکھو