''پُرانا گھر پِیراں دا
گدی نشین میاں خیرالدین سلامت
میاں خیری سلّا،
کُل مُلکھ وِچ ناں ایہا ای وجدا اے،
بُھکھا گیا سو رج پُج آیا
ننگا گیا لباس لیایا،
ورھیاں دے پئے پواڑے
مِیئیں خیری سلّا سوئی چُھہائی کنڈا نِکل گیا،
کِنے مدرسے کھولے
کِنے یتیم خانے،
کِنیاں ویاہیاں
کِنیاں پڑھائیاں
کِتھے کِتھے لوائیاں،
پِیڑھیو پِیڑھی چلسن قصے
دھن دولت دا گھاٹا کوئی نہ
حکومت مُغلاں دی
سِکّھاں دی انگریزاں دی
جیہڑی وی آئی
مُربّے دیندی آئی مِیئیں دیاں وڈکیاں نوں،
ہُن امریکن کمپنیاں وِچ حصے
مِلاں مالاں دی مِلکھ دا لیکھا کوئی نہ
آل اولاد پڑھ وڈیاں جہانی یونیورسٹیاں
راج کاج پئی کردی اے،
ورھے دے ورھے حج
وِچ وِچ عُمرے
حِفظ قران تے کَچھ مصَلّا
وِرد وظیفے نفل نمازاں
جِنی وی بھج ترُٹ ہووے اندر
پُھوک مِیئیں دی کرے تسَلّا،
ہر ویلے آل دوال کرامت چرچا
اِک بھیت اے،
ادھی راتیں سُتّا پیا اُٹھ کیوں آہندا اے اپنے آپ نوں
کن سن وِچ:
'کلّا، تُوں کلّا'
نیندر مُڑ نہیں پَیندی''،
''تینوں اوہدی گھر والی دسیائے؟''
''سُندیاں آئیاں ہاں اوہ وی میں وی
تیجے کِسے نوں پتہ کوئی نہ
پنجاہ ورھے میں رات گوڈے گُھٹّے نیں
باراں دی ساں جدوں لگی آں کم تے،
ڈھیر پِیتے سُو نقش
دوائیاں ولَیتوں آئیاں،
گُھٹ زم زم دا بھر سوندا اے،
'کلّا، تُوں کلّا'
ادھی راتیں آکھنوں جِیبھ نہیں ٹلدی''
''تابو ساہ اوہنوں آوندا ای
مویا نہیں
رُسّی جِند سمجھوتیاں پئی کریندی اے:
'میں جُسّے تیرے وِچ پرت پواں
جے سانجھی ورتن جگ تے آنن لئی
رل ٹُریں لوک نال پیرو پیر''
''ہُن ہوئی اے پُوری سار،
ایہہ کِسے نال میں نہیں کیتی،
اج تیرے نال کرنی آں پئی
ڈھیر عِوضانے دِتے سُو میری چُپ سیوا دے،
گھر وی زر وی،
چُچی تینوں ویری جگ سدیندا اے
سانوں واندی نظر ہیں توں
جے میں تینوں نہ مِلدی
تیری سُجھائی کار ونگارے نہ لگدی
مر مُک گئی ہوندی کلّی
چروکی''