افریقہ دی گل اے
حبشی راہک پکی عمر دا اپنے کم تے ویندا اے پیا
اِک سوہنا جوان بانکا
اگوں لگا آوے، کول آیا تے ساہویں آن کھلوتا
رنگ اچنبھا
اِک پل گورا اِک پل سانولا
جھٹ لاکھا مُڑ گورا
راہک پچُھیائے ''سائیں کیہڑے دیس دے او؟''
''ایسے داں''
''کیہنوں مِلنا جے''
''تینوں مُیَسر''
''کیہ کم جے''
''یار مُیَسر گل صاف ای کرنی پینی اے
میں شیطان آں
سُنیا تے ہوسی عرشوں فرش تے لہنا میرا
ایتھے بھولے تیرے ورگے
اپنا آپ گوائی بیٹھے نیں
کیہ نیں کیہ ہو سکدے نیں
اصلوں بُھلائی بیٹھے نیں''
''اپنے کم تے میں پیا وَیناں''
''چھڈ، تُوں وڈے وڈے کم کرنے نیں''
''جاون دے، چِر پیا ہوندا اے''
''ایہہ ویکھنائیں مُگدر''
موٹی زنجیر نال بَدّھا بھارا گولا لوہے دا اوس کڈھ وکھالیائے
''پہلوں میں سٹناں مُڑ تُوں سٹیں
جے تُوں جِت گیوں تے میں اگوں ہٹ ویساں''
مُگدر بُھوا شیطان وگایائے
دوئے لبھن ٹُرے نیں اپڑے نیں اِک تھاں
وڈا سارا مگھورا
''ترَے مُلک ایہدے وِچ دھس گئے نی''
بانہہ لمکا شیطان مُگدر کڈھیائے
''ہُن تیری واری او''
نپ بھوایائے مُگدر مُیَسر
''یا ابراہیم ذرا پِچھانہہ ای رہنا
یا موسیٰ پیراں دا خیال کریو''
''تُوں تے اُتانہہ پیا سٹنائیں یار،
بھلی چیتے کرائی او
کُجھ سمیان میں اپنا اُتے ای چھڈ آیا ساں
اوہنوں نہ ہووے نقصان''
''یا عیسےٰ دھیان''
''بس بھائی، اوہ سمیان ہُن تیرے حوالے……
رکھ تُوں مُگدر وی''
پاسے ہویائے شیطان،
مُیَسر بانہہ نال ول زنجیر موڈھے دھر ٹُریائے مُگدر
]زورانِیل ہرسٹن دِیاں جوڑِیاں ''کالیاں دیاں لوک کہانیاں''
وِچوں اِک پڑھ کے بنائی بات]