کپل وَستڑو جھوک وی شہر وی ہا
کرت کلا بھاجی وَست راس آہی
آپ آپنا آپنا غیر وی ہا
اَنّ رِزق وی ہا نالے زہر وی ہا
نکو نک خلقت مُونجھ مَست آہی
حال واس آہی
تختوں اُٹھیا رِزق اُداس رانجھا
جُھگا آپنا پُھوک کے سیکیو سُ
جَگ ویکھنی پھول پَھڑی جوگ ٹوہنی
وَجا عِشق بوہا بوہڑ ویکھیو سُ
سنّھ میں نوں لا کیتی تَد بوہنی
نِکل آپ وِچوں تھیا سبھ سانجھا
وَکھ واہن بُھلے سانبھ کھان بُھلے
چُھٹ مُوڑیاں دان بھنڈار رَلیاں
نالو نال وسیندِیاں مدتاں تھیں
ہِک دُوجڑی ویکھ حیران کھلیاں آکھن ‘‘ واہ سجن’’
کئیں جُگ لگے بُت ڈھالنے نوں
اُٹھی خلق مُڑ کِیل بہالنے نوں