گاون
(لَینگسٹن ہیوز دا جوڑ گنویا)
میرے لئی تے سبھ جائیں اوہا ای نیں
سیرالون دے کنڈھے ہوون
یا کپاہ پیلیاں الباما دیاں
کمبرلے دِیاں ہیرے کھاناں
یا ہائیٹی دِیاں کَوفی ڈَھکیاں
مدھ امریکے کیلے جُوہاں
یا ہارلم گلیاں
شہر طرابلس اتے مراکش دے
ہر تھاں کالے جی لُٹیندے گولیاں نال مریندے نیں پئے
رگ اوہناں دی وگ بھریندی اے
ڈالر
پاؤنڈ
فرانک
پیسٹیا
لیرا
ٹَھگّی دی دھن ڈھیری،
چنگا ہووے تے رت میری
وگ بھرے اُتھلّ سروور ڈُونگھے
وگ اُتھل دِیاں پکیاں تلیاں وِچ سرے
رَتّے1 دھج2 سارے
کھڑے مینوں پرے
سیرالونوں
کمبرلے، الباما کنوں
ہائٹی، مدھ امریکہ، ہارلموں
مراکش، طرابلسوں
دیس مدھولے جیہڑے نیں مارو لُٹیر دھگان نے
نلَجّے لالچ نے،
چنگا ہووے جے رت میری
جگ دیاں ہِین کمیراں دے انگاں وِچ رلے
اُدھارے3 سبھ دیساں نُوں
ڈالر پاؤنڈ فرانک پیسٹا لیرا والے ٹھگیاراں کولوں،
ایہہ ہوسی تاہیوں
واہراں رتیاں جگت دِیاں
مُکھ جیہناں دے کالے چِٹے بدامی پِیلے بُھورے
رل چاون دھج سُوہے
سدا اَن ڈَھینے
1- رتّے= رتا کرے، لال رنگ چڑھاوے- 2 -دھج= جھنڈے-3 -اُدھارے= آزاد کرے-