دھرت اساں دا چک وے
بھانڈا ہور بنے
بھن ٹُھوٹھا بھن مَٹ بھڑولا
پَک پرات خُدائی رَجے بُھکھ دھرو نہ دَھک وے
بھانڈا ہور بنے
بَھن ٹُھوٹھا بَھن مَٹ بھڑولا
جوئی بھانڈا سوئی بھنڈارا ورتے رِزق صِدَق وے
بھانڈا ہور بنے
بَھن ٹُھوٹھا بھن مَٹّ بھڑولا
نہ میرن نہ میرن
تانا ہور تنے
تروڑ بزارا کھڈی کھاڑا
پہن اپنے نہ ہوون پرائے ہیرنہ ہٹّی پھیرن
تانا ہور تنے
تروڑ بزارا کھڈی کھاڑا
اُن کے نواں پواون اوہا اُنیا جو اُدھریڑن
تانا ہور تنے
تروڑ بزارا کھڈی کھاڑا
کِھڑ نرمے جو دھاگہ ہوئیاں کیتیاں عشق اٹیرن
تانا ہور تنے
تروڑ بزارا کھڈی کھاڑا