فرید بھنڈار

چِراں پِچھوں

اج پھیرا شہر لہور دا اساں لایا اے،

ایہہ مُڑ کے کِسے وسایا اے؟

سڑکاں ایہہ اوہا تاں نہیں،

پگ پگ1 ہٹیو ہٹی ہویا پیا اے،

ناں تے وجدائے2 اجے میکلوڈ ای

پر سِنما کوئی نہیں دِسدا ایتھے،

دروازہ دِلّی اونویں کھلوتا ہویا اے کھول کے بانہِیں

آہندا اے لنگھو نا اندر بھائی جی

پڑھ کے جُمعہ وزیر خانی

پھرو بزار کشمیری

دسو، کتاباں کِتھے گئیاں،

اکھیاں گاہکاں مالک پُشتو پُشتی دُکاناں

1۔ پگ پگ= پیر پیر- 2۔ وجدائے= مشہُور اے-

ریڑھی واناں دِیاں

مکھیاں بن کے ماکھی1 فون چ ٹُھکیاں پئیاں نیں،

لنگھے آں اساں

اندروں پل اِک اوبھڑ2 جیہا پِنڈورا3

پلّہ کھچ کے آہندا اے:

سَودا ای ہا نا اگے وی

سَودا ای ہُن اے،

جیہڑا بھُلیکھا اگے وچھایا ہویا ہا کسبی کارِیگراں

اوہناں دی آل اولاد وی اوہا اج وِچھائی بیٹھی اے،

تُرکاں مُغلاں انگریزاں دی بادشاہی

موریا آشوک سِکندر ہرش پورس دی

چندر ونسی سُورج ونسی راج4 گاہی5 اُگراہی6

گئی تے کِتے وی نہیں

کر امریکی میک اپ گُوڑھا

سَلّھن7 لہائِیاں 8 آئی بیٹھی اے

1۔ ماکھی= شہد- 2۔ اوبھڑ= باہر دا، اجنبی، پردیسی- 3۔ پنڈورا= پِنڈ دا- 4۔ راج= حاکمی-

5۔ گاہی= کنک چوں تُوڑی وکھ کر دانیاں دا ڈھیر لاون- 6۔ اُگراہی= وصولی، ہالا اکٹھا کرن-

7۔ سلّھن= سمیٹن، سانبھن- 8۔ لہائی= 1) لاہن دی مزدُوری، 2) چکلے دِیاں کسبی عورتاں دی کمائی،

3) بے عزتی-