]بِینی پِھینی، نُوری فتُوری، شَونکی، بُرجُو، خِلجی کلیجی، مِیرُو بھمِیرُو، آئے بیٹھے نیں سرگھی دے ویڑھے- گلاں گلاں وِچ شَونکی پچُھیائے]
شَونکی: ماسی سرگھی تُساں کدیں میک اپ نہیں کیتا؟
سرگھی: کوئی ویلا ہا کیتا کُجھ چِر
شَونکی: وت؟
سرگھی: وت چھوڑ دِتا
شَونکی: کیوں ماسی؟
سرگھی: مور نُوں ویکھ کے
شَونکی: مور نُوں؟ اوہ کیوں
سرگھی: پچُھو مور نُوں
شَونکی: کیویں پچُھیئے
سرگھی: آؤ مور ہو پچُھنے آں
]بُرجُو مور بن گیا اے- پَیل پائیوس- سریر کَسّ وِچ کنبدا وی اے- ہَولی ہَولی پَیل مُکی اے تے ٹہلن لگ پیا اے]
مور: پَیل ڈِٹھی جے نا- عجوبہ گِندے او ایہنوں، پتہ جے ہے کیہ اے…… دسّو…… چلو چھڈو- ایہہ وکھالا جے- ایہہ رانگلی پُشاک، ایہہ دَھون صُراحی، ایہہ کسّ ٹسّ- وکھالا سارا
شَونکی: کیہدے لئی اے ایہہ وکھالا
مور: تُہاڈے لئی
شَونکی: ساڈے کولوں کیہ لینا ہوندا اے تُوں وکھالا کر کے
مور: واہ واہ
خِلجی: بس واہ واہ؟
مور: بس کیوں، ہور واہ واہ، مور واہ واہ، پتہ جے نا انگریزی وِچ مور ہور ہوندا اے
خِلجی: تے تُوں اپنی اصل ہوند چھڈ کے انگریزی مور ہو گیوں؟
مور: مور واہ واہ ہور واہ واہ، چونہہ کوٹاں وِچ شور واہ واہ…… جِنی واہ واہ ودھے نا اونی واہ واہ دی بُھکھ ودھدی جے
شَونکی: تُوں واہ واہ دے روڑھ وِچ وگیندا ہور ہوندا گیوں تے مور؟ اصل مور؟
مور: اصل تے مور دی ہے ای کوئی نہیں - جو پئے ویکھدے او، ایہو ای اے جو ہے- وکھالا- ایہہ نِری موراں دی گل نہیں پُوری نَر جُون ای وکھالا اے- کُکڑ ویکھو، کلغی لا کے بانکا بنی کھلوتا اے- کویلیاں بانگاں دئی آوندا اے تے پل پل مگروں کھمب کنِیاں مار مار کے کُکڑیاں پسماوندا تے چڑھ دَبَلّدا اے- شِینہہ دی گجّ سُنو، پٹے ویکھو اوہدے- کیہ اے، وکھالا ہور کیہ
]کُکڑ بن کے آیائے خِلجی، دَھون سِدھی کیتی ساسُ]
مور: ٹھرَمّا مولانا، رتاکُ ٹھرَمّا- ہے بانگ دا ویلا؟ جے ہے تاں لاؤڈ سپِیکر دا بندوبست کر لیئے نا
کُکڑ: میری واج نُوں لاؤڈ سپِیکراں دی لوڑ نہیں
]مور دے کول ہو کے کھمب کنّی ماری سُو]
مور: اوہ ہو- حضرت مرغ مُسَلّم صاحب، میں کُکڑی تے نہیں تُہاڈی سرکار
کُکڑ: تینڈے رَولے نے مت مار چھڈی اے
مور: مینڈا رولا؟
کُکڑ: چونہہ کوٹاں وِچ شور واہ واہ
مور: اوہ یار- میں تے ایہناں پراہونیاں نال اپنے اصلے دا ویروا پیا کریندا ساں
کُکڑ: کون نیں ایہہ پراہونے تینڈے
مور: بندے ای نیں
کُکڑ: تُوں بندیاں دے دندے نہیں نہ ویکھے…… باہروں اندر آوندیاں دی پڑتال کروا گِھدی سائی؟ کوئی چُھری چاقو تے نہ ہا کِسے کول؟
شَونکی: تُسیں آپ کر لؤ پڑتال جناب
]بانہِیں چائیاں سو- کُکڑ اوہدے ول کھمب کنّی ماری اے]
مور: ]کُکڑ نُوں پرے کر کے] کوئی ہوش نہیں یار تینوں، اج کلغی وی نیلی ہوئی پئی اے
کُکڑ: جِبھ تینڈی چٹ گئی اے رت- پر کلغی تے میں آپوں نِیلی کرائی اے
مور: کیوں
کُکڑ: امبر ویکھے تے شیشہ پھڑے، سمندر ویکھے تے ہٹ ہٹ چڑھ چڑھ میلے میچے اپنے آپ نال
مور: سِیمرغ، سِیمرغ
]کُکڑ مٹکدا نِکل گیا اے]- وکھالا……
شَونکی: تینوں کیویں ایہہ سار تھئی پُوری ایس وکھالے دی
مور: تھلاں دے جائے آں بھاء- ریتڑاں وِچ اپنیاں اکھاں نُوں اپنا آپا وکھالن لئی رنگ چاڑھنے پوندے نیں
]ذرا پرے مورنی آئی اے، نِرت رنگ وِچ بھوئیں تے بَھوندی اے چُگدی، چُگ چُگ جوڑیندی]
شَونکی: مورنِیاں دے تے ایڈے رنگ پسارے کوئی نہیں ہوندے- اوہ نہیں ویکھدِیاں اپنا آپا؟
مور: اوہناں دی اوہناں نُوں پچُھ
]شَونکی مورنی ول گیا اے]
شَونکی: میں اِک گل پچُھنی آہی جی
مورنی: دس نہیں چھڈی اوہنے ساری ]رنگ رُجھی گل سُنیندی کریندی اے]
شَونکی: اپنی دَسِیوسُ- تہاڈی آہندا اے تُسیں آپ ای دسیسو
مورنی: جیہڑی دسی سُو اوہنوں پُٹھا کر کے پا گِھن
شَونکی: میں پا گِھناں …… تے……
مورنی: پاؤ ہنڈاؤ تاں ای سار تِھیندی اے، دسن دساون کیہ ہویا
شَونکی: ہُوں، ایہہ بھیت اے
مورنی: بھیت ای رہنا اے
شَونکی: کیہ کراں وت
مورنی: کر جو میں پئی کرینی آں شَونکی
شَونکی: ]اچنبھا] تُہانوں ناں مینڈا کیویں پتہ لگا
مورنی: جو پیا کرینا ایں اوہدے توں
شَونکی: ایہہ وت اُگھ سُگھ موراں کول ای اے- بندیاں نُوں تے بس اپنیاں ای ناواں دا پتہ ہوندا اے
مورنی: موراں کول نہیں
شَونکی: معافی…… مورنیاں کول…… معافی
مورنی: کرنہارِیاں کول آکھ، مورنیاں ہوون توڑے چورنیاں
]شَونکی مورنی ہار بھون لگ پیا اے بھوئیں ول ویہندا]
مورنی: ایہہ تے نہیوں پئی کریندی میں شَونکیا- رِزق پئی جوڑینی آں اپنے تے اوہدے لئی
]بِینی کُکڑی بن آئی اے، چُگدی بھوئیں وِچوں نِرت رنگ وِچ]
مورنی: ایہنوں مِلی ایں؟
کُکڑی: آہو- شُکر اے کُکڑ نہیں ایہہ
مورنی: کیویں پک ای؟
کُکڑی: ہووے ہا تاں ہُن تائیں باراں کھمب کنیاں مار کھلا ہوندا
مورنی: کُکڑی ایں نا، کُڑی نہیں نہ تُوں
کُکڑی: آہو بندے وی کُکڑ ای ہوندے نیں کہ- داڑھی رکھ لین تے بانگاں تے آ ویندے نیں، دینہہ ویکھدے نیں نہ رات- پر داڑھی وان ہوون بھاویں اُسترا پوش کنّی مارنوں نہیں ٹلدے
مور: ]ایس پاسے آ کے] وکھالا…… سبھ وکھالا
]اپنے پاسے پرت گیا اے]
شَونکی: ایہنوں کیویں سار تھئی جو نَراں دا کم وکھالا ای اے نِرا
مورنی: راجیاں نواباں کول جو رہ آیائے- اوہناں پوند تھل وِچ تاڑ ایہدے پَر کھسّ آندے- اپنے چھتر بناون تے پگّاں وِچ ٹُنگن کان- مُڑ ایہنوں محلاں وِچ آن رکھیونیں - پَیلاں پوائیاں نیں ایہدے کولوں رانیاں موہرے
]شِینہہ دی بُھبھ سوہل جیہی]
شَونکی: لؤ، تُساں راجیاں نواباں دی گل چھوہی اے تے آ گیائے ساڈا شِینہہ مہاراج- مِل آواں میں
مورنی: مِل آ- جیویں ہیں تیویں رہیں، گھابریں نہ متاں کھوہ پے ونجے بُڈھڑے نُوں تے تینوں اندر ای میل لوے
]شَونکی گیا اے، اگے مِیرُو شِینہہ بنیا کھلا اے مور نال]
مور: ]شَونکی نُوں] مِل لے وئی ایس بزرگ ساڈے نُوں پر رتا وِتھ رکھ کے
شِینہہ: ]مور ول سینتر] ایہہ آپوں وی وِتھ رکھی کھلا اے میتھوں - پچُھو میں کیہ لاہ لینا اے تینڈا- ساگ کھانا اے تینڈیاں پراں دی سرہوں دا؟
مور: جی تاں کریندا اے کاں بن بیٹھاں تینڈے موڈھے اُتے تے جُواں کڈھاں تینڈیاں شاہانی زلفاں دِیاں
شِینہہ: نہ- اوہ آپے رکھیاں ہوئیاں نی میں، ہُن ہور کیہ کھا سکنے آں …… میں کُجھ دُراڈکا ای ساں یار، سدا تینڈا جاں مِلیا اے- نس بھج تے ہُن ہوندی کوئی نہیں - اپڑدیاں ایتھے چنگا جھٹ لگ گیا اے
مور: کُکڑ تے تُرت ای آ گیا ہائی
شِینہہ: ووضو کرایوس تینوں؟
مور: کنّی ماری ساسُ مینوں وی تے ایہنوں وی
شِینہہ: مینوں ویکھ تراہ تے نِکل ویندا اوہدا پر کنّی تے وج ای جانی ہئی تراہ نال تِلکدیاں وی
مور: ببّر خاں صاحب ایہہ تے فرماؤ تُسیں تراہ کیوں کڈھیندے او لوکاں دا
]شِینہہ رتا اُلّر کے بُھبھ ماریسُ- مور تے شَونکی اچیتی تربھک کے پِچھانہہ ہٹے نیں]
شِینہہ: بس، ایسے لئی- تراہ اپنا جو سدا دا نِکلیا ہویائے مینڈا
مور: سدا دا؟
شِینہہ: تراہ دی دُنیا وِچ جو وسنے آں پئے- تینڈیاں پَیلاں وی تے تراہ ولاون لئی نیں …… ہُن کیہ خبر ایس باؤ نال رل کے چڑیا گھر ٹورُو ایں مینوں کہ کِسے سرکس والے دا پٹہ پوائُو ایں گل مینڈے وِچ
مور: سو تراہ کڈھن والیاں دا اپنا تراہ پہلوں ای نِکلیا ہوندا اے
]مورنی آئی اے]
مورنی: ]مور نُوں] کیوں بھبھکاں پیا مروانا ایں ایہدے کولوں، اوہ شِیہنی آئی اے ساڈے کول تے بُھبھ سُن کے ایہدی سُنگڑی بیٹھی اے
مور: تسَلّا کرا سُو- اسیں تے نر اصلے دی سار پئے گِھننے آں ایہدے کنوں - جِس کان سدیائے اِتھائیں ایہنوں
مورنی: بس- ہور بُھبھ نہیں ہُن
]مورنی پرت ٹُری اے، شَونکی وی مگر اے]
شَونکی: ]مُونہہ بھواں کے شِینہہ نال] مِل آواں جے اجازت ہووے تے
شِینہہ: مِل آ پر ساڈیاں سوانیاں دا وی پڑدا ای ہوندا ای بندیاں کولوں، ایہہ دھیان کریں
]شَونکی ٹُر گیا اے]
مور: ایہدی تے ماں برابر اے اوہ
شِینہہ: مینڈی تے ووہٹی اے میاں
مور: ویکھن والے تے تینوں ای ویکھدے نیں زُلفاں والیا- اوہنوں ساد مُرادی نُوں کیہ ویکھنائے کِسے-
شِینہہ: چل بند کر ایہہ بکڑواہ ہُن، ایویں مینوں تاء نہ چڑھا…… ماف کریں یار چڑھ ای جاندا اے تاء ایس عُمرے…… اچھا اوہ گل تے وِچے ای رہ گئی- میں تے پچُھنا ہئی تُوں سدیا کاہدے لئی ہا مینوں، ایس چھوہر نُوں ملاونا ہئی؟
مور: آہو یار- ایہنوں نر جُون دا وکھالا سہی کراونا ہئی- جیہڑا میں کر وکھالیا اوہ کُکڑ وی کر وکھالیا اپنے رنگ وِچ تے ہُن تُوں وی
شِینہہ: مُڑ تاء چڑھائُو جے مینوں ایہہ
مور: تے مار لے بھبھکاں …… مینڈیاں پَیلاں کیہ کُکڑ دِیاں بانگاں تے کھمب کنِیاں کیہ تے تینڈیاں گجّاں کڑکاں کیہ، سبھ اِکو ای اے
]پرلے پاسے مورنی آئی اے، مگر کُکڑی تے پِچھے شِیہنی تے شَونکی- شِیہنی سرگھی دا رُوپ اے]
مورنی: ]شِیہنی نُوں] نِسل ہو کے بہو تُوں - اوہ ایویں اپنا سانگ بنا کے ہاسا پیا کریندائے مور نال-
شِیہنی: کیڈیاں سُکھالیاں ہو تُسیں دوئے، نراں کنوں پرے- دھرت وِچوں رِزق بھال پئیاں چُگیندیاں جوڑیندیاں ہو- ازاد تُسیں وی او، دھرت وی اے- اوہدا وی کنت کوئی نہیں، سُورج چند خبرے بھرا نیں اوہدے
مورنی: یار نی- ایسے کُھل پاروں تے ماندی اے بے انت رنگ پریت دے
کُکڑی: اساں وی اوہا ای ہاں - اوہدے ہار ای سیونیاں اپنے ست دے نِگھ نال نویاں رُوحاں نُوں، جوال پالنیاں نویں سار دے درشن کراون لئی- اپنا ان رِڑکیا دھن اوہناں دیاں لُواں وِچ ٹھیلنیاں، اُٹھو تے نویلیاں جاگاں لاؤ کُل جِیا جُون نُوں
]شِیہنی وی اوہناں دے نال رلکن لگ پئی اے بھوئیں ٹوہندی- جو دانہ لبھداسُ کُکڑی مورنی کول آن دھریندی اے]
کُکڑی: ]اِک دانہ شِیہنی دے مُونہہ وِچ دھر کے] کھا ویکھ ایہہ
شِیہنی: نواں سواد اے
]اُدّم نال دانے چُگن جوڑن وِچ رُجھ گئی اے- شَونکی وی رلیا اے]
مورنی: شَونکی، نر وی نار ہوون سِکھ لین نا، تے وکھالے دا پواڑا ای لہہ ونجے نیں مناں توں
]مور تے شِینہہ آ کھلوتے نیں کول]
شِینہہ: ]شِیہنی نُوں] ہَیں - ایہہ تُوں کیہ پئی کرینی ایں؟
شِیہنی: جو اساں ساریاں پئیاں کرینیاں
شِینہہ: پر تُوں ایہناں وِچ کیویں
شِیہنی: تُوں وی آ نا، ہڈاں نُوں نونہدرن چھڈ تے دھرت کنوں رِزق لے اپنے تے مینڈے لئی، سگوں ساڈے ساریاں لئی- ہُن تے دند وی جواب دے گئے ہوئے نی
شِینہہ: ساڈا تے دِل ای دنداں وِچ رہیا اے بیگم صاحبہ
شِیہنی: تے کھا گئے او نا دِل وی میاں صاحب
شِینہہ: اچھا- ایہہ چھوہر وی جنی بنیا پیا اے نال تہاڈے- ایہنے کوئی گل تے نہیں کیتی تینڈے نال
شِیہنی: نہیں - میں کیتی اے ایہدے نال تے پئی کرینیاں
شِینہہ: تُوں …… پر کیوں
شِیہنی: اساں ساریاں پئیاں کرینیاں، ویہندا نہیں پیا تُوں - میں ہُن تینڈے پوائے پڑدیوں باہر نِکل آئی آں
شِینہہ: کیوں میاں،…… کیہ ناں اے تینڈا…… ناں وی بھُلن لگ پئے نیں ……
شِیہنی: شَونکی
شِینہہ: ٹھیک آہندی اے مورا- مینڈے پڑدیوں تے نِکل کھلوتی اے- بندیاں نُوں یار پئی بنیندی اے- کِسے سرکس وِچ نچاسن نا تاں پتہ لگسی
شِیہنی: تے جیہڑی تُوں سرکس پیا کراونا ایں مینوں، تے تینڈے سنگی پئے کراوندے نیں ایہناں مینڈیاں ساتھناں نُوں
مور: وکھالا- سبھ وکھالا
مورنی: وکھالے دے نعرے مار کے ویہل پیا ولاونا ایں جے اج کوئی دربارِیا ٹکّر گیا تے اوہنوں ہا پُشاک ویچ کے ترَے ڈنگ میوے کھا گِھنِیں
مور: میں تے ہُن تھل پیا لبھناں کوئی- جِتھاں اجے کِسے درباری مجاور دی جِیپ نہ گئی ہووے
مورنی: ہُن ایس دُنیا وِچ ایہجہے تھل کوئی نہیں
مور: تُسیں دُنیا کوئی ہور وساؤ سارِیاں رل کے
مورنی: ایہہ وسیندیاں تے پئیاں ہاں - تُوں وی تے رل نہ جھٹ مورنی تھی کے
مور: میں تے مورنی ہو ویساں بھاویں وکھالے کان ای- پر کُکڑ کُکڑی کیویں ہوسی
مورنی: جیویں لکڑ لکڑی
مور: ایڈی سَوکھی نہیوں گل- اوہ نہ ہووے حضرت مُرغ مُسَلّم صاحب کُڑک نُوں کھمب کنی مار کے آنڈے سارے بھن چھڈن ویلے توں پہلوں ای
مورنی: کُکڑی ہوون لئی پہلوں اپنا آپا بھننا پوسی، اپنی مُسَلّم ہوند حلال کرانی پوسی
کُکڑی: حلال کہ حرام
شِینہہ: آہو سچ تُوں ایہہ دس…… کیہ ناں اے تینڈا
مور: شَونکی
شِینہہ: آہو شَونکی میں پچُھنا ہا وکھالا تے کم ہویا نراں دا- جیویں مور سمجھایا اے پر تُہاڈی وسوں وِچ ناریاں کیوں وکھالا کریندیاں نیں مُونہہ سِر رنگ کے تے پُشاکاں دی مشہوری بن کے
شَونکی: ساڈی وسوں جیہنوں تُساں آہندے ہو اِکو جیہی تے نہیں نا- اِک دِھر اوہدی کرنہاراں دی اے تے دُوجی سہیڑوُاں تے مَلّ واناں دی-
شِینہہ: چلو- پر ہوندا ایہہ کیوں اے اُتھائیں
شَونکی: مَلّن سلّھن والے اپنیاں ناراں دے تت نُوں وکھالے دی بُھکھ وِچ گوا دینا چاہوندے نیں، ناراں دے تت کنوں وڈا سہم اے نراں نُوں
کُکڑی: تدوکا جدن دا اوہناں ناراں کنوں اوہناں دی کرنی کھَس کے گھرِیں بند کیتا- پتہ اے اوہناں نُوں ناراں دے اندر گھنا وگوچا اے اپنی اصل ہوند نُوں بنھ وجن دا- سو سہمے وتدے نیں متاں کِسے ویلے ایہہ وگوچا کُھلی نابری نہ بن کھلووے سو ایہناں نُوں وکھالے وِچ ایتنا رُجھاؤ جو اپنے تت دی سار ای نہ رہے نیں
شَونکی: ہُن وکھالے دا چاء کرنہارِیاں وِچ وی پیا لہندا اے اوہ مالکناں نُوں ویکھدیاں نیں، وکھالے دی جِت اوہناں نُوں موہندی اے
مورنی: وکھالے دی جِت ای اوہدی بھاج تھی وینی اے
مور: تِھیندی اے پئی، کیوں ببّر خاں صاحب
شِینہہ: ساڈے بھاء دی تے تھی گئی اے اج
مور: سار پئی تھیندی اے- سانوں اپنے ویہار ویترے نر آپے نُوں تج کے ویہار اُتھَلّدھر نار آپے وِچ ڈھلنا پوسی
مورنی: ]شَونکی نُوں] کرنہاریاں نُوں آکھو وکھالے دا جالا اپنے اندر نہ لگن دیون
کُکڑی: لاہ دیون جیہڑا لگیائے
]دوئے کھمب پسار کے جالا لاہون دی نِرت کریندیاں نیں شِیہنی وی رَلی اے]
مور: جالا اے سارا وکھالا ]نچ رلیائے]
مورنی: جالا جال جے وِس دِیاں تاراں تنیا، رل لاہو لہاؤ نی اڑِیو
سَت گھاٹ ڈُھک دھاؤ
]شِینہہ وی اپنی جائیں بانہیں چا نچ پھیری لئی اے]