''تُوں آکھیں ایہہ پِپلی اے
میں کیہ آکھاں، میں تے ہوئی کوئی نہ،
وِٹھ آہی اِک طوطڑی دی
کندھ دی جِھیت تے لنگھدی دھر گئی
بی اوہدے وِچ پِپلی دا ہا
گولھ جو طوطڑی کھادی آہی لال تاج ونی چُنج نال چاء کے،
ہُن دس میں کیہ ہوئی
بی وِٹھ چُنج کہ پوٹا آندر پِٹھی طوطڑی دی
کہ وڈی پِپلی جَیں بی جایا
کہ مِٹی جیہنے اُگائی اوہ
کہ پانی جیہڑے پال سمھال کھلاری
کہ ساگر گھر پانی دا
کہ پانی دی ماں واء
کہ رل ایہہ سارے ناں نام جو ہوئے؟
جے میں ایہہ ہاں
تے تُوں کون ہیں کیہ،
سہی تے ایہا ہوندا ای پیا
’میں‘ ’تُوں‘ قدرت وِچ نہیں ہوندی''