نَیئِیں وگن پئیاں
شہر اساڈے ورگے وِچ وی،
پانیوں سکھنیاں دُھروں ای
مِسس پی کنوں ودھ مِٹیالیاں
ودھ ہِین
ودھ بے یقین
ہڈسن ہارلم ورگے ردیاں واہناں کنوں وی،
نیئیں وگن پئیاں
وات ایہناں دے چوندے نیں دینہہ رات
پھگن کتیں سیال اُنھال،
ناڑِیں اساں دبیلاں دِیاں ہِن بیٹ ایہناں دے،
نیئیں وگن پئیاں
بُڈھ مٹیاراں
رُتو رُت ہِکیاں
ہِک ہِک موڑیاں
کُوڑے سنگ سنگھاریاں،
چاتی ودیاں نیں سِر تے شہر کُوں
مونہہ لُک لِبڑے
سِرمٹ تِڑکے
سُپنے تَچھے پَچھے،
سَدھر سُپن دیاں ہیکاں واجاں وِچ گونجارن،
نیئیں وگن پئیاں
گِھریاں دوالِیں
بُڈ بُڈ اکھوں پروکھیاں
اُبھر تگن دینہہ رات
پھگن کتیں سیال اُنھال
کشٹ جھگیندیاں
دینہہ چڑھدے اُٹھ انکھ کرُولی کر ست ٹوہ
وِچ گھول دے رلن پئیاں،
در در شہر نیئیں
تَس جَل وگن پئیاں