فرید بھنڈار

[کھیڈیندا اپر پہاڑاں

شہراں گراواں وِچ

سڑکاں پکیاں تے-]

‘‘ہاں پتھر اساں

تُساں رَل کُٹ بجری کیتا ’’

‘‘اندر باہر سڑکاں

ہتھو ہتھ چوا تُساں جو ڈِھڈّو ڈِھڈّ وگائیاں

سودے پھیر گھروڑے لاہے’’

‘‘بھر بھر بُھکھ ٹرک گُٹھو گُٹھ بھیجی

مہنگی کر کر ویچی’’

‘‘لُوں لُوں وِچوں چُوپ منافع تن من وکّھر کیتے

بُوہے بُوہے کر سانوں وچھایا پُھوہڑی’’

‘‘چڑھ چڑھ جھنڈے گڈن لئی تُساں سانوں پہاڑ بنایا’’

‘‘چِت تہاڈا مَل دا فیتا

اپنی میں دا مَتھا مسِیتا’’

‘‘اساں روال ہاں

‘‘ہوون اساڈا دان جہان ہے’’

‘‘ٹھرِیاں نوں اگ اُڑِیاں نوں سگھ’’

‘‘کال دھمال ہاں

‘‘ہتھلاں نوں اساں ہتھ ہوئیاں

جُڑ پتھ پتھر

کِیڑاں دے سِر چَھت ہوئیاں’’

‘‘رنگ برنگ اساں پتھر سَتر وِچ ننگ مننگ ہاں’’

‘‘اساں روال ہاں

جُڑ ہر ہر وِچ جُوڑی’’

‘‘کُل کھیال ہاں’’

‘‘سار اَدِس اچھوہ ہے ساڈی

دھرتیاں ان گِنیاں وِچ ساڈے

سُورج لکھ الکھ نیں’’

‘‘گُمّاں اجل گُماون کیتے

جِیون جل پیاون کیتے

گیڑ گیڑیندیاں پئیاں’’

‘‘سائیُج1 بولی

مذہب سہج2 اساڈا’’

‘‘نام بے ناواں جھولی جھولی’’

‘‘داء دھگان دے تروپے ٹُٹن

اکھ تہاڈی وکّھر سِیتی

اندر اپنے سانوں سُنجانے’’

‘‘مُڑ پَل جِیون مانے’’

-1 سائیُج= 1) اِکو جیہے ہوون، 2) کُل دی برابری، 3) قُدرت نال مِلاپ-

-2 سہج= 1) اصلوں اِکو جیہے ہوون، 2) قُدرت دا ویہار-