پارک وِچ آیاں
سطر سُجھی اے ‘‘دس مِٹھوا اج کیہڑی چُوری کھانی او’’
نظم ٹُری جے اگے لکھیئے کاہدے تے
کاغذ نال نہیں آندا
یاد زبانی رہنی کوئی نہیں
ایویں ایویں دے شاعر ہوئے
ہے کتاب پر ہے مانگویں
اوہ خراب نہیں کرنی
کاغذ لبھ جاسی کوئی ڈِگا ویکھو ایڈی کاہدی گل اے
پھیرا مُکیائے دِسیا کوئی نہیں
ٹِشو اے اِک نک پُونجھ کے سٹیا
ڈبی سِگٹ دی مِدھی
جُوس دا ڈبہ پاٹا
سچی مُچی دے شاعر سُنیائے لِکھ کے ایہو جیہیاں شیئیں
جیلوں باہر گھلدے سن،
پُٹھ تے بستے لدّی
گِٹھ مِٹھیئے دو چھوہر سکولوں نسے
اِک اُچی کُڑی دے مگر نیں جاندے
نہیں مناسب روک ایہناں توں کاغذ منگنا،
پَتر چائم اِک چَیڑا1
ادھ پِیلا ادھ ہریا
پِچھلے پاسے واہے حرف سَرے نیں جیہڑے
گھر آ کاغذ اُتے چڑھائے نیں
فرش تے دھریا پتر مُڑیائے
مُونہہ لاساں نال بھریا
دس مِٹھوا
اج کیہڑی چُوری کھانی او
چُپڑ سندُھوری ہوٹل فائیو سٹاروں
کہ ٹھیکہ لنگر توا تندوری
آپے چُن میاں، دور جمہوری
جبر قدر والی گل ہُن ہوئی پرانی او
پِنجرے پیاں اساں پِنجرے پائیوں
پڑھ کلمہ مجبوری
سوہنیا اینکر ہوویں مشہوری ویچیں
رینکنگ گہنے پاویں
لیڈر بن بولیں
روز اخباریں آویں جاویں
سُرخی متھا رولیں
خُطب خطابی ریڑھی بھاویں پُوچھل حِکمت ٹھپہ
چُنج نال قسمت پتہ چاویں سیل فون تے سَٹّہ
بس مِٹھوا
کپے ہوئے پر ہو نہ جان مدھانی
ویکھیں، پانی او
1- چَیڑا: چوڑا-