فرید بھنڈار

تِتر کھمبر بدلی چَترنگ مینہہ ہے

تَن تَھن وِچوں بے وَس رَس ٹَھلیا

نِت وسنا اَن وسیا

چھال بسنتر چَھل گالھڑ

مَل پَتن کھلوتا ہے سَرپَر 

پَر نہ آکھو کوئی شینہہ ہے

ایہہ رام مگر ہنومان ناہیں

نَوسَروانی لشکر وِچ لندھورَ بَلی بَلوان ناہیں

ساڈا کچی دے قاعدے والا لام لنگور ہے رُکھ

دُکھ دھرتی تے سُکھ بُور ناہیں

کَل کَلّر وِچ نشان نیاں

بے تَھوہیاں نوں تھاں 

کائی اَندھ اَندھارا ناروں نُور حُضور ہے

نِت دِسنا ان دِسیا

ایہہ چِیر دَھجا مجبوراں دی بے مجبوری

ایہہ سمّی چِننگ سندھُوری

واریاں نی وار نواریاں

نِت جِتیاں اَن دِسیاں دِسیاں سو ہاریاں

رُکھ ‘‘ ترور’’ وی اکھوائے نیں

اِک ہو دو ناں آئے نیں مادھو لال حسین سخی

‘‘ وَر’’ ورتن دی ‘‘ تر’’ وتر دی، بَھیناں

اِکّو گھر دوئے

وِڈ بیٹھیاں نی کائی سَونکن کارا ڈَیناں

ایہہ حشر طلاقا صُورہے رُکھ

نِت سُنیا ان وَجیا

سُوہاں

بُجھکا:بجھارت-   چترنگ:ڈب کھڑّبا، کئیاں رنگاں والا، ابلق، کوڈیاں والا، جیہدے اُتے مورتاں بنیاں ہوون-  بسنتر:اگ-  مَل پتن:نیں وی ڈونگھی تلا پرانا شینہاں تاں پتن مَلّے (شاہ حسین)-  لندھور:لنکا دا حاکم، امیر حمزہ کولوں ہار کے نوشیروان دے لشکر وِچ رَل گیا (داستان امیر حمزہ)-  کَل:کال، ویلا، جھگڑا-  کلّر وِچ……:جنڈ جنڈورا بار دا، کلّر وِچ نشان (مرزا صاحباں)-  نشان: جھنڈا-   چِیر:1)ٹاکی،کپڑا 2)پھٹ 3)جِت، فتح-  چِیری: لِکھت، فرمان-  دھجا:جھنڈا-  دھج:1)لیر 2)سج، بناء حالت-   ترور:رُکھ-   وتّر:ساواں، برابر، ٹھیک-  ورتن: ورتارا، رزق ونڈ، ویہار-  صور:قیامت ویلے وجن والا اسرافیل دا دُھوتو- ور: 1)وگدا پانی، چشمہ، واں، سرور-  2)چون، مَن دی مراد، جوڑ- 

[جنڈی بُجھ بُجھّکے دی]