فرید بھنڈار

آپے لوء تے آپ ہنیرا

آپے حد ان حد بنیرا،

تج کے مِلکھ نسب منصوبے

تھی گیا رانجھا

جَل تَھل جِیا جُون دا سانجھا

جِیون دا رنگ کار،

اساں ہاں آتن

بے رنگ تھیون آس اساڈی بِرہا اساڈی سیج،

وکھ ہوون ہِک تھیون اسانوں

تَس دی چس ہے امرت پیون،

رتڑی اکھیں اوہ سِکھر سیالے

سنجھ سویرے گھت دو میلوں 1 گھام2 اسانوں چھوہے:

آپ دھراپ پسار3 دِیاں ہو تُساں ہی ٹَھپنہار

ویہندیاں میرے

دھرتی اُتوں مڑھیا منڈپ4 اُدھیڑو

1- دومیلوں = دو میل (اُفق) توں – 2- گھام= دُھپ، گرمی-3- آپ دھراپ پسار= آپا دھاپی دا پسارا کھلارا-4- منڈپ= کُھلا عارضی ہال، شاہی لشکراں دے ٹھہرن لئی وی منڈپ پوائے جاندے سن، اُمراء دے جشن لئی وی-

کوٹھے منڈپ ماڑِیاں اُساریندے وی گئے   (فرید)