اکھر پُونیاں نیں کہ تکلے
تگ صدیاں ترنجنیں جیہڑے مِلاں وِچ لگے نیں
پَھل نیں ہلاں دے اکھر کہ ڈھگے
ہو ٹریکٹر ٹرالے جیہناں
تُوسیاں منڈیاں بُھکھیاں
اکھر بالن نیں
چڑھیندے دیگ دوارے
کہ دُھونیاں اَن دُھکھیاں
کہ سُوئیاں 1
اُٹھ تویاں توں سیل فونِیں وڑ ٹُھکیاں
فرش نیں دوزک ہوئے
کہ پؤڑی بہشت منارے
جِیبھاں نیں اکھر، سُنِیئر؟
گِنن پُنن پئے ہتھ ہو جیہڑے
جِیوندیاں کیویں مرنائے
ہوئی ہونی نوں
اَن ہوئی کیویں کرنائے
-1 سُوئیاں جیہناں نال توَے (گراموفون ریکارڈ) بولدے سن-