''رانی نِرتکار ہے شپیا
جہان تے جانی مانی،
تُوں وی تے فَین بے چَین ہیں اوہدا، کیوں، نہیں؟
''کیوں نہیں سَیدو جیویں تیرا ہاں''
''آہو سچیا،
رانی نوں شوق بلپن دا ہا
مینوں وی ہا
نچن تے پَیریں کُڑیاں دے قدرت پا دیندی اے
ٹِھبنا جو ہویا چال چلن مرداویں دا دھونسا،
سِکھیاسُ جگت اُستاداں کولوں
کیہ کُٹ پیہہ کے اوہا جاندی او،
لگن گھنیری ہوندی گئی
دُنیا تے نام کمایا
مُلک مُلک توں پَیریں پئے پرائز ایوارڈ
محل پوایا ٹھاٹھ ہنڈایا،
شوق پُھلاں دا مُڈھوں ہا
باغ اچرج لوایا
گھر عجائب گھر ای پُھلاں دا
کٹھے کھیڈے ساں نِکے ہوندیاں شپیا
ویلا کڈھ کے کدیں میرے ول آ جاندی اے
کردی اے اپنی کار کتھا،
چِراں پِچھوں کل مِلن ہویا اے
رنگ ہور ہا رانی دا
واج وی ہور ہوئی:
گل اچرج ہوئی آ سیدو
باغ چ پِھرنی پئی آں پُھلاں نوں مِلدی
تِتری نوں ایویں چھیڑ میں بیٹھی آں:
ویکھو گمانی مستانی
اُڈ اُڈ ڈَھیندی پھیرے پُھلاں تے میرے پئی ایہہ پاؤندی جے
آن اوہ میرے ہتھ تے نہ بہہ گئی
گُمانی تُوں ہیں میں؟
جیہڑی میری عام چال اے، لمی پے اُستاداں اگے تُوں جگ تے ویچن جوگی ہوئیوں
پچُھ پھُلاں نوں تیرے نیں میرے؟'
پھُلاں ول میں ویکھن لگ پئی
سُر اَن سُنیا کنیں پیا:
پھُل سانوں جگ آہندائے
نی اساں تے ہوئیاں پتیاں
ہریاں کھٹیاں رتیاں
تِتری دیاں نہ تیریاں
تیریاں نہ میریاں
چھنڈ چھڈ آپا
رنگ رنگ کُل سراپا پَل پَل ہونیاں ہاں،'
سُندیاں سار ای مستی تِتری دی ہور دی ہور نہ ہوئی؟
اکھے ہُن کِھڑیا ہے سچ نی اڑئیے
ہُن کِھڑیا ہے سچ،
پتیاں ای نیں ایہہ پر وی اساڈے
نال اساڈے نچ، نی اڑئیے نال اساڈے نچ،
سَیدو
کر پیر گُم سُم نیں میرے
رُک رُک آہندے نی اِک دُوجے نوں:
اساں وی پتیاں ای ہاں
کیہ اسانوں بنیاں
اوہ نِرت اساں نہ کھیڈی
جیہدے لئی رتیاں ساں